ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສຳຫຼວດກວດກາຕີລາຄາຄວາມຮັບຜິດຊອບລວມ ຂອງຄະນະບໍລິຫານງານພັກ ແລະ ຄວາມຮັບຜິດຊອບຂອງກຳມະການພັກແຕ່ລະສະຫາຍ ໂດຍມີການວິເຄາະໄຈ້ແຍກຢ່າງເລິກເຊິ່ງການເຄື່ອນໄຫວນຳພາຕົວຈິງເພື່ອໃຫ້ເຫັນອັນດີ-ຜົນງານ, ອັນອ່ອນ-ຄົງຄ້າງລວມ ຂອງຄະນະບໍລິຫານງານພັກ ຄະນະກວດກາສູນກາງພັກ ແລະ ຂອງບຸກຄົນຄະນະພັກ ໃນໄລຍະ 2 ປີກວ່າ, ການຈັດກອງປະຊຸມຄັ້ງນີ້ໄດ້ແບ່ງອອກເປັນ 3 ວາລະຄື:​ ວາລະທີ 1 ກອງປະຊຸມທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນຄະນະພັກ ຄະນະກວດກາສູນກາງພັກ ກາງສະໄໝທີ IV, ເຊິ່ງໃນນັ້ນໄດ້ຜ່ານ ຄໍາສັ່ງ ຂອງຄະນະເລຂາທິການສູນກາງພັກ ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ ເລກທີ 268/ລຄລສພ, ລົງວັນທີ 20 ມັງກອນ 2023; ຜ່ານມາດຕະຖານລວມ ຂອງພະນັກງານນໍາພາ-ຄຸ້ມຄ້ອງ, ມາດຕະຖານສະເພາະຄະນະບໍລິຫານງານພັກກະຊວງ-ອົງການ, ໜ້າທີ່,​ ສິດຂອງຄະນະພັກດັ່ງກ່າວ ແລະ ຂໍ້ຫ້າມສໍາລັບສະມາຊິກພັກ; ວາລະທີ 2 ແມ່ນໄດ້ຜ່ານຮ່າງສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ຂອງຄະນະພັກ ຄະນະກວດກາສູນກາງພັກ; ຜ່ານຮ່າງບົດສະຫຼຸບການຈັດຕັ້ງປະຕິບັດແຜນພັດທະນາວຽກງານກວດກາ ຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ ແລະ ປະກອບຄຳເຫັນຕໍ່ 2 ບົດສະຫຼຸບດັ່ງກ່າວ ໂດຍເນັ້ນໜັກ 3 ວຽກຄື: ວຽກງານກວດກາພັກ, ກວດກາລັດ, ຕ້ານ ແລະ ສອບສວນການສໍ້ລາດບັງຫຼວງ; ວາລະທີ 3 ແມ່ນໄດ້ຜ່ານຮ່າງບົດສຳຫຼວດການນຳພາລວມ ຂອງຄະນະບໍລິຫານງານພັກ ຄະນະກວດກາສູນກາງພັກ ກາງສະໄໝທີ IV, ປະກອບຄໍາເຫັນໃສ່ຮ່າງບົດສໍາຫຼວດການນໍາພາລວມ ຂອງຄະນະບໍລິຫານງານພັກ ຄະນະກວດກາສູນກາງພັກ ກາງສະໄໝທີ IV ແລະ ສໍາຫຼວດບຸກຄົນໃນຄະນະພັກ.

ນອກນີ້ ສະຫາຍ ປອ ຄຳພັນ ພົມມະທັດ ຍັງໄດ້ຮຽກຮ້ອງມາຍັງບັນດາສະຫາຍ ຄະນະບໍລິຫານງານພັກ, ບັນດາສະຫາຍສະມາຊິກພັກ, ກໍ່ຄືຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບການເມືອງ, ສຸມສະຕິປັນຍາເຂົ້າໃນການຄົ້ນຄວ້າ, ວິເຄາະ, ພິຈາລະນາຕໍ່ບັນຫາຕ່າງໆຢ່າງກົງໄປກົງມາ, ເລິກເຊິ່ງ ແລະ ເຮັດໃຫ້ກອງປະຊຸມໃນຄັ້ງນີ້ດຳເນີນໄປດ້ວຍຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ຢ່າງຈົບງາມ.