ໃນວັນທີ 14 ມິຖຸນາ 2023 ທີ່ຫ້ອງປະຊຸມກະຊວງອຸດສາຫະກໍາ ແລະ ການຄ້າລາວ ໄດ້ຈັດກອງປະຊຸມພົບປະຮ່ວມມື ແລະ ແລກປ່ຽນບົດຮຽນ ວຽກງານກວດກາ ລະຫວ່າງ ກົມກວດກາ ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ແລະ ກົມກວດກາ, ກະຊວງອຸດສາຫະກໍາ ແລະ ການຄ້າ ແຫ່ງ ສສ ຫວຽດນາມ, ໂດຍພາຍໃຕ້ການເປັນປະທານຮ່ວມຂອງ ທ່ານ ພຸດທະວັນ ນັນທະວົງ ຄະນະປະຈຳພັກກະຊວງ, ປະທານຄະນະກວດກາພັກກະຊວງ, ຫົວໜ້າກົມກວດກາ ກະຊວງອຸດສາຫະກຳ ແລະ ການຄ້າ ລາວ ແລະ ທ່ານ ເລ ຫວຽດ ລອງ ຫົວໜ້າກົມກວດກາ ກະຊວງອຸດສາຫະກຳ ແລະ ການຄ້າ ຫວຽດນາມ, ມີຄະນະນໍາ, ພະນັກງານກົມກວດກາ ກະຊວງອຸດສາຫະກຳ ແລະ ການຄ້າ ແລະ ຜູ້ຕາງໜ້າພາກສ່ວນທີ່ກ່ຽວຂ້ອງ ທັງສອງຝ່າຍເຂົ້າຮ່ວມ.

ກອງປະຊຸມຄັ້ງນີ້, ເພື່ອສືບຕໍ່ຜັນຂະຫຍາຍໝາກຜົນ ຂອງກອງປະຊຸມແລກປ່ຽນ ແລະ ແບ່ງປັນບົດຮຽນໃນວຽກງານກວດກາ ລະຫວ່າງ ກົມກວດກາ ກະຊວງ ອຸດສາຫະກຳ ແລະ ການຄ້າລາວ ແລະ ກົມກວດກາ ກະຊວງອຸດສາຫະກຳ ແລະ ການຄ້າ ຫວຽດນາມ ຄັ້ງທຳອິດ ປີ 2019 ທີ່ກົມກວດກາ ກະຊວງອຸດສາຫະກໍາ ແລະ ການຄ້າ ຫວຽດນາມ ເປັນເຈົ້າພາບ. ເຊິ່ງການພົບປະໃນຄັ້ງນີ້, ນອກຈາກທັງສອງຝ່າຍໄດ້ຮ່ວມກັນຕີລາຄາຄືນການຈັດຕັ້ງ ແລະ ຜັນຂະຫຍາຍບັນດາໝາກຜົນ ໃນໄລຍະທີ່ຜ່ານມາ ຍັງເປັນການຮັດແໜ້ນຄວາມສາມັກຄີແບບພິເສດອ້າຍນ້ອງລາວ-ຫວຽດນາມ, ຫວຽດນາມລາວໃຫ້ແໜ້ນແຟ້ນຂຶ້ນຕື່ມ ແລະ ຍັງເປັນການແບ່ງປັນປະສົບການ ໃນຂົງເຂດວຽກງານກວດກາ; ວຽກງານຕ້ານການສໍ້ລາດບັງຫຼວງ; ການຄົ້ນຄວ້າແກ້ໄຂຄໍາຮ້ອງຟ້ອງ-ຄໍາສະເໜີ ແລະ ວຽກງານກວດສອບພາຍໃນ, ພ້ອມກັນນັ້ນ, ໄດ້ແລກປ່ຽນບົດຮຽນໃນວຽກງານກວດກາ ໃນ 5 ຂົງເຂດ ເປັນຕົ້ນ ວຽກງານຄົ້ນຄວ້າບັນດານິຕິກຳດ້ານກົດໝາຍ; ວຽກງານກວດກາພັກ, ກວດກາພາຍໃນ; ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ: ວຽກງານຄົ້ນຄ້ວາຄໍາຮ້ອງຟ້ອງ ແລະ ຄຳສະເໜີ.