ວັນທີ 27-28 ເມສາ 2023 ນີ້້, ກະຊວງພະລັງງານ ແລະ ບໍ່ແຮ່ ໄດ້ຈັດກອງເຜີຍແຜ່ເນື້ອໃນຈິດໃຈຂອງກອງປະຊຸມວຽກງານກວດກາທົ່ວປະເທດ ປະຈໍາປີ 2022 ແລະ ສະຫຼຸບວຽກງານກວດກາ ປະຈໍາປີ 2022 ຂຶ້ນ ທີ່ຫ້ອງປະຊຸມຂອງກະຊວງພະລັງງານ ແລະ ບໍ່ແຮ່ ພາຍໃຕ້ການເປັນປະທານຂອງສະຫາຍ ນາງ ຈັນສະຫວາດ ບຸບຜາ ຄະນະປະຈໍາພັກ, ປະທານກວດກາພັກ, ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ໂດຍໃຫ້ກຽດເຂົ້າຮ່ວມຂອງສະຫາຍ ປອ. ໂພໄຊ ໄຊຍະສອນ ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງພະລັງງານ ແລະ ບໍ່ແຮ່, ມີບັນດາ ຄະນະພັກ-ຄະນະນໍາ, ເລຂາຄະນະພັກຮາກຖານ, ເລຂາ-ຮອງເລຂາ ໜ່ວຍພັກ, ຜູ້ກວດກາໜ່ວຍພັກ ແລະ ພະນັກງານລັດຖະກອນ ພາຍໃນກະຊວງພະລັງງານ ແລະ ບໍ່ແຮ່ ເຂົ້າຮ່ວມ.

ໃນພິທີ ສະຫາຍ ປອ. ໂພໄຊ ໄຊຍະສອນ ໄດ້ໃຫ້ກຽດກ່າວເປີດພິທີ ພ້ອມທັງໄດ້ເຜີຍແຜ່ບົດໂອ້ລົມ ຂອງສະຫາຍ ປອ. ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັັດ ແລະ ຕ້ານການສໍ້ລາດບັງຫຼວງຂັ້ນສູນກາງ ຕໍ່ກອງປະຊຸມວຽກງານກວດກາທົ່ວປະເທດ ປະຈໍາປີ 2022; ຈາກນັ້ນ, ສະຫາຍ ທອງພັດ ອິນທະວົງ ຮອງເລຂາຄະນະພັກ, ຄະນະປະຈໍາພັກ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ຂຶ້ນເຜີຍແຜ່ເອກະສານຄໍາສັ່ງແນະນໍາ ເລກທີ 169/ຄລສພ ຂອງຄະນະເລຂາທິການສູນກາງພັກ ກ່ຽວກັບການເພີ່ມທະວີການນໍາພາ-ຊີ້ນໍາ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ; ເຜີຍແຜ່ເອກະສານລະນຶກວັນສ້າງຕັ້ງອົງການກວດກາພັກ-ລັດ ສປປ ລາວ ຄົບຮອບ 41 ປີ (16/02/1982-16/02/2023); ພ້ອມນີ້, ສະຫາຍ ນາງ ຈັນສະຫວາດ ບຸບຜາ ໄດ້ຂຶ້ນເຜີຍແຜ່ບົດແນະນໍາ ເລກທີ 74/ຄກສພ ຂອງຄະນະກວດກາສູນກາງພັກ ກ່ຽວກັບການກະກຽມດໍາເນີນຊີວິດການເມືອງກາງສະໄໝ ຂອງຄະນະບໍລິຫານງານພັກແຕ່ລະຂັ້ນ; ເຜີຍແຜ່ບົດສະຫຼຸບຫຍໍ້ການເຄື່ອນໄຫວວຽກງານກວດກາ 2022 ແລະ ທິດທາງຈຸດສຸມປີ 2023 ຂອງຄະນະກວດກາສູນກາງພັກ; ໂອກາດດຽວກັນນີ້, ສະຫາຍຄໍາຫຼ້າ ວິຈິດວົງສາ ຄະນະພັກ, ຫົວໜ້າກົມກວດກາ ຂຶ້ນຜ່ານຮ່າງບົດສະຫຼຸບຫຍໍ້ການເຄື່ອນໄຫວວຽກງານກວດກາ 2022 ແລະ ທິດທາງວຽກງານຈຸດສຸມ ປີ 2023 ໂດຍໄດ້ຍົກໃຫ້ດ້ານດີອັນພົ້ນເດັ່ນ, ດ້ານອ່ອນ-ຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້ ໃນການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ທິດທາງວຽກງານຈຸດສຸມໃນຕໍ່ໜ້າ, ຈາກນັ້ນ ບັນດາຜູ້ເຂົ້າຮ່ວມກອງປະຊຸມກໍໄດ້ພ້ອມກັນປະກອບຄໍາຄິດເຫັນໃສ່ຮ່າງບົດສະຫຼຸບການເຄື່ອນໄຫວວຽກງານກວດກາ ປະຈໍາປີ 2022 ແລະ ທິດທາງວຽກງານຈຸດສຸມ ປີ 2023 ຢ່າງກົງໄປກົງມາ, ພາວະວິໄສ ແລະ ແທດ ເໝາະກັບຕົວຈິງ ເພື່ອເຮັດໃນມີເນື້ອໃນຈະແຈ້ງຄົບຖ້ວນ.