ວັນທີ 31 ມີນາ 2023 ກະຊວງສາທາລະນະສຸກ ໄດ້ຈັດກອງປະຊຸມສະຫຼຸບຕີລາຄາການເຄື່ອນໄຫວວຽກງານກວດກາປະຈຳປີ 2022 ແລະ ທິດທາງແຜນການປີ 2023 ໂດຍການເປັນປະທານກອງປະຊຸມຂອງທ່ານ ດຣ ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ ມີທ່ານຫົວໜ້າກົມ, ຮອງຫົວໜ້າກົມກວດກາ, ພະນັກງານຜູ້ທີ່ເຮັດວຽກງາກວດກາ ແລະ ແຂກຖືກເຊີນຈາກບັນດາກົມ ກະຊວງສາທາລະນະສຸກເຂົ້າຮ່ວມ.

ໃນກອງປະຊຸມໄດ້ຜ່ານຮ່າງບົດສະຫຼຸບການເຄື່ອນໄຫວວຽກງານກວດກາປະຈຳປີ 2022 ແລະ ທິດທາງແຜນການປະຈຳປີ 2023 ເຊິ່ງໄລຍະ 01 ປີຜານມາໄດ້ສະແດງອອກຜົນສໍາເລັດຫຼາຍດ້ານເປັນຕົ້ນ: ໄດ້ສຸມໃສ່ການລົງຕິດຕາມ, ກວດກາປົກກະຕິຢູ່ບັນດາກົມກອງອ້ອມຂ້າງກະຊວງສາທາລະນະສຸກ ຈຳນວນ 09 ພາກສ່ວນຄື: ພະແນກສາທາລະນະສຸກ 15 ແຂວງ ແລະ ນະຄອນຫຼວງວຽງຈັນໃນແຕ່ລະແຂວງ, ຫ້ອງການສາທາລະນະສຸກເມືອງ ແລະ ໂຮງໝໍນ້ອຍແຂວງລະ 01 ແຫ່ງ; ກວດກາການຈັດຕັ້ງປະຕິບັດໂຄງການລົງທຶນຂອງລັດເລີ່ມແຕ່ຫົວທີແມ່ນໄດ້ປະຕິບັດຕາມກົດໝາຍວ່າດ້ວຍການລົງທຶນຂອງລັດ,ໄດ້ປະມູນ ແລະ ແຕ່ງຕັ້ງຄະນະກຳມະການຕິດຕາມ, ກວດກາພາກສະໜາມຄື: ຕິດຕາມ,ກວດກາໂຄງການກໍ່ສ້າງສູນປິ່ນປົວໂຄວິດ 19 ແຂວງສາລະວັນ ເຊິ່ງມີມູນຄ່າລວມ 6.500.000.000 ກີບ ໄດ້ຊຳລະແລ້ວ 4.000.000.000 ກີບ ຍັງຄ້າງຊໍາລະ 2.500.000.000 ກີບ; ໂຄງການກໍ່ສ້າງສາງຢາພະແນກສາທາລະນະສຸກແຂວງ ໄຊສົມບູນ ມູນຄາ 2.387.639.980 ກີບ ການກໍ່ສ້າງມີຄວາມຄືບໜ້າ 30%; ການແກ້ໄຂຜົນການກວດກາ ແລະ ກວດສອບ ແມ່ນໄດ້ຈັດຕັ້ງປະຕິບັດຄຳຕັດສິນຂອງສານ 02 ຄະດີຄື: ຄົນຮ້າຍທຸບລົດແມ່ນເອົາເງິນຂອງຫ້ອງການປະກັນສຸຂະພາບແຫ່ງຊາດລວມມູນຄ່າເສຍຫາຍຈຳນວນ 290.000.000 ກີບເກັບກູ້ຄືນໄດ້ຈຳນວນ 67.000.000 ກີບ ແລະ ພະນັກງານ-ລັດຖະກອນຍັກຍອກ, ຈູດທຳລາຍຊັບສິນຂອງລັດ ຢູ່ສູນໂພຊະນາການລວມມູນຄ່າເສຍຫາຍຈຳນວນ 1.630.912.742 ກີບ ເກັບກູ້ຄືນໄດ້ຈຳນວນ 10.000.000 ກີບ,ຍັງຈະສືບຕໍ່ເກັບກູ້ຈຳນວນທີ່ຍັງເຫຼືອ; ລົງຕິດຕາມການແກ້ໄຂຜົນຂອງການກວດສອບລວມມີ 47 ບັນຫາ ຢູ່ກົມກອງອ້ອມຂ້າງ 10 ພາກສ່ວນ ແລະ ຢູ່ຂັ້ນທ້ອງຖິ່ນ 01 ແຂວງ ປັບປຸງແກ້ໄຂໄດ້ຂາດຕົວ 10 ບັນຫາ, ບໍ່ຂາດຕົວ 18 ບັນຫາ ແລະ ບໍ່ໄດ້ຮັບການແກ້ໄຂ 19 ບັນຫາ. ຫຼັງຈາກທີ່ໄດ້ຜ່ານບົດສະຫຼຸບແລ້ວຜູ້ແທນກອງປະຊຸມ ກໍ່ໄດ້ປະກອບຄໍາເຫັນຕໍ່ບົດສະຫຼຸບ ແລະ ແຜນການຢ່າງກົງໄປກົງມາໃຫ້ມີເນື້ອໃນຄົບຖ້ວນເພື່ອນໍາໄປຈັດຕັ້ງປະຕິບັດໃນຕໍ່ໜ້າໃຫ້ມີປະສິດທິຜົນດີຂຶ້ນກ່ວາເກົ່າ; ນອກນີ້ຍັງໄດ້ເຜີຍແຜ່ບັນດາເອກະສານທີ່ສຳຄັນເປັນຕົ້ນແມ່ນບົດສະຫຼຸບຫຍໍ້ວຽກງານກວດກາທົ່ວປະເທດປະຈຳປີ 2022 ແລະ ທິດທາງຕາດໝາຍສູ້ຊົນປີ 2023 ຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ; ບົດໂອລົມຂອງທ່ານ ປອ ຄຳພັນ ພົມມະທັດ ກຳມະການກົມການເມືອງສູນກາງພັກ,ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທາອົງການກວດກາແຫ່ງລັດ ແລະ ຕ້ານການສໍ້ລາດບັງຫຼວງຂັ້ນສູນກາງ ຕໍ່ກອງປະຊຸມວຽກງານກວດກາທົ່ວປະເທດປະຈຳປີ 2022; ຄຳສັ່ງແນະນຳເລກທີ 169/ຄລສພ ຂອງຄະນະເລຂາທິການສູນກາງພັກກ່ຽວກັບການເພີ່ມທະວີການນຳພາ-ຊີ້ນຳ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ; ເຜີຍແຜ່ແນະນຳບາງບັນຫາໃນຄຳສັ່ງເລກທີ 268/ຄລສພ ກ່ຽວກັບການດໍາເນີນກອງປະຊຸມ ຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ; ເຜີຍແຜ່ເອກະສານລະນຶກວັນສ້າງຕັ້ງອົງການກວດກາພັກ-ລັດ ສປປລາວ ຄົບຮອບ 41 ປີ ( 16/2/1982-16/2/2023), ກອງປະຊຸມໄດ້ດໍາເນີນໄປເປັນເວລາ 01 ວັນ