ອົງການໄອຍະການປະຊາຊົນສູງສຸດ ຈັດກອງປະຊຸມສະຫຼຸບວຽກງານກວດກາພັກ ປະຈຳໄຕມາດ I ປີ 2023 ແລະ ເຜີຍແຜ່ຜົນສໍາເລັດກອງປະຊຸມສະຫຼຸບວຽກງານກວດທົ່ວປະເທດ ປະຈໍາປີ 2022
28/03/2023
ໃນວັນທີ 28 ມີນາ 2023 ທີ່ຫ້ອງປະຊຸມ ອົງການໄອຍະການປະຊາຊົນສູງສຸດ (ອອປສ) ໄດ້ຈັດກອງປະຊຸມສະຫຼຸບການເຄື່ອນວຽກງານກວດກາພັກ ປະຈຳໄຕມາດ I (1,2,3) ປີ 2023 ແລະ ເຜີຍແຜ່ຜົນສໍາເລັດກອງປະຊຸມສະຫຼຸບວຽກງານກວດກາທົ່ວປະເທດ ປະຈໍາປີ 2022 ຂອງຄະນະກວດກາສູນກາງພັກ ຂຶ້ນ ພາຍໃຕ້ການເປັນປະທານຂອງ ສະຫາຍ ບຸນທັນ ບຸນທະວິໄລ ຮອງເລຂາຄະນະບໍລິຫານງານພັກ, ປະທານຄະນະກວດກາພັກ, ຮອງຫົວໜ້າອົງການໄອຍະການປະຊາຊົນສູງສຸດ, ມີຄະນະກວດກາພັກ ອອປສ, ບັນດາສະຫາຍເລຂາ, ຮອງເລຂາໜ່ວຍພັກ ທັງຂັ້ນສູນກາງ ແລະ ທ້ອງຖິ່ນ ເຂົ້າຮ່ວມ ດ້ວຍລະບົບເຊິ່ງໜ້າ ແລະ ລະບົບວິດີໂອທາງໄກ.
ໂອກາດດຽວກັນນີ້, ສະຫາຍ ບຸນທັນ ບຸນທະວິໄລ ໄດ້ມີຄໍາເຫັນ ແລະ ກ່າວເປີດ ກອງປະຊຸມ ໂດຍສະຫາຍໄດ້ຍົກໃຫ້ເຫັນຄວາມໝາຍຄວາມສໍາຄັນຂອງວຽກງານກວດກາ ເປັນວຽກໜຶ່ງທີ່ສໍາຄັນທີ່ສຸດຂອງພັກ ນັບແຕ່ມື້ສ້າງຕັ້ງພັກເປັນຕົ້ນມາ ໂດຍໄດ້ຍຶດໝັ້ນທັດສະນະທີ່ວ່າການນໍາພາຂອງພັກຕ້ອງຕິດພັນກັບວຽກງານກວດກາ ດັ່ງຄໍາເວົ້າທີ່ວ່າ ຖ້າບໍ່ມີການກວດກາ ກໍ່ໝາຍຄວາມວ່າບໍ່ມີການນໍາພາ ເພາະວ່າວຽກງານກວດກາ ຕິດພັນກັບການນໍາພາ-ຊີ້ນໍາຂອງພັກໃນທຸກໄລຍະ ແລະ ທຸກຂົງເຂດວຽກງານ ເວົ້າລວມ, ເວົ້າສະເພາະ ກໍແມ່ນພາຍໃນອົງການໄອຍະການປະຊາຊົາສູງສຸດ ຕ້ອງຖືເອົາວຽກງານກວດກາ ເປັນໜຶ່ງໃນການກໍ່ສ້າງພະນັກງານໃຫ້ມີຄຸນທາດການເມືອງໜັກ ແໜ້ນ, ມີຄຸນສົມບັດສິນທໍາປະຕິວັດ, ມີຈັນຍາບັນ, ຈັນຍາທໍາ, ມີຄວາມຮັບຜິດຊອບສູງຕໍ່ໜ້າທີ່ວຽກງານ ເພື່ອຈໍາກັດຫ່າງສຽງຈາກສັງຄົມ ແລະ ໄດ້ຮັບຄວາມເຊື່ອໝັ້ນຈາກສັງຄົມ.
ຈາກນັ້ນ, ສະຫາຍ ນາງ ພອນທິບ ສາວະລີ ຮອງປະທານຄະນະກວດກາພັກ, ຫົວໜ້າກົມກວດກາອົງການໄອຍະການປະຊາຊົນສູງສຸດ ໄດ້ຜ່ານບົດສະຫຼຸບການເຄື່ອນວຽກງານກວດກາພັກ ປະຈຳໄຕມາດ I (1,2,3) ປີ 2023 ແລະ ທິດທາງແຜນການວຽກງານຈຸດສຸມ ປະຈຳໄຕມາດ II (4,5,6) ປີ 2023 ໃຫ້ຮູ້ວ່າ ຄະນະບໍລິຫານງານພັກ ອົງການໄອຍະການປະຊາຊົນສູງສຸດ ປະກອບມີ 10 ໜ່ວຍພັກທີ່ຂຶ້ນກັບ, ມີພະນັກງານລັດຖະກອນທັງໝົດ 231 ສະຫາຍ ຍິງ 99 ສະຫາຍ, ມີສະມາຊິກພັກທັງໝົດ 194 ສະຫາຍ ຍິງ 75 ສະຫາຍ ໃນນັ້ນມີສະມາຊິກພັກສົມບູນ 184 ສະຫາຍ ຍິງ 75 ສະຫາຍ, ສະມາຊິກສໍາຮອງມີ 10 ສະຫາຍ ຍິງ 04 ສະຫາຍ ແລະ ສະມາຊິກພັກບໍານານ 15 ສະຫາຍ ຍິງ 01 ສະຫາຍ, ຕິດຕາມມະຫາຊົນກ້າວໜ້າທີ່ຈະຂະຫຍາຍເຂົ້າພັກ ມີ 4 ສະຫາຍ, ທາບທາມມະຫາຊົນຜູ້ກ້າວໜ້າ ເພື່ອເຂົ້າຮຽນສະໜັບສະໜູນ ຈໍານວນ 3 ສະຫາຍ, ທາບທາມມະຫາຊົນຜູ້ກ້າວໜ້າ ເພື່ອເຂົ້າຮຽນກົດລະບຽບພັກ ຈໍານວນ 3 ສະຫາຍ, ຮັບມະຫາຊົນຜູ້ກ້າວໜ້າເຂົ້າເປັນສະມາຊິກພັກສໍາຮອງ ຈໍານວນ 2 ສະຫາຍ, ເລື່ອນສະມາຊິກພັກສໍາຮອງເປັນສະມາຊິກພັກສົມບູນ ຈໍານວນ 2 ສະຫາຍ; ສໍາລັບວຽກງານວິຊາສະເພາະ ປະຈໍາໄຕມາດ I ແມ່ນໄດ້ແກ້ໄຂຄະດີ ແລະ ຄໍາຮ້ອງ ຄື: ຄະດີອາຍາ ຈຳນວນ 184 ເລື່ອງ, ໃນນັ້ນ, ຄະດີຄ້າງມາແຕ່ໄຕມາດ IV/2022 ມີ 53 ເລື່ອງ, ຄະດີເຂົ້າໃໝ່ ມີ 131 ເລື່ອງ, ປັດຈຸບັນແກ້ໄຂສໍາເລັດແລ້ວຈຳນວນ 70 ເລື່ອງ, ຍັງຄ້າງຈຳນວນ 114 ເລື່ອງ (ໃນນີ້ຂໍຄໍາເຫັນນໍາຄະນະນໍາ 27 ເລື່ອງ ແລະ ກໍາລັງຄົ້ນຄວ້າ 87 ເລື່ອງ ); ຄະດີແພ່ງ ມີ 255 ເລື່ອງ, ໃນນັ້ນຄະດີເຂົ້າໃໝ່ ມີ 195 ເລື່ອງ, ແກ້ໄຂສໍາເລັດແລ້ວຈຳນວນ 143 ເລື່ອງ, ຍັງຄ້າງຈຳນວນ 112 ເລື່ອງ; ໄດ້ຮັບຄຳຮ້ອງ, ຄຳສະເໜີ ກ່ຽວກັບວຽກງານຕ້ານການສໍ້ລາດບັງຫຼວງຈຳນວນ 07 ເລື່ອງ, ໃນນັ້ນເຂົ້າໃໝ່ ຈຳນວນ 04 ເລື່ອງ, ໄດ້ສົ່ງໃຫ້ພາກສ່ວນກ່ຽວຂ້ອງຄົ້ນຄວ້າແກ້ໄຂຈໍານວນ 03 ເລື່ອງ, ພວມດໍາເດີນຄົ້ນຄວ້າແກ້ໄຂຈໍານວນ 04 ເລື່ອງ;
ພ້ອມນັ້ນ, ບັນດາຜູ້ແທນທີ່ເຂົ້າຮ່ວມຍັງໄດ້ມີການປະກອບຄວາມເຫັນຢ່າງກົງໄປກົງມາດ້ວຍຄວາມຮັບຜິດຊອບສູງ ແລະ ຕີລາຄາສູງ ຕໍ່ກັບວຽກງານກວດກາ ດ້ານຂໍ້ສະດວກ, ຂໍ້ຫຍຸ້ງຍາກ ແລະ ທິດທາງຈຸດສຸມໃນຕໍ່ໜ້າ. ນອກຈາກນັ້ນ, ກອງປະຊຸມຍັງໄດ້ເຜີຍແຜ່ເອກະສານບົດສະຫຼຸບຫຍໍ້ວຽກງານກວດກາທົ່ວປະເທດ ປະຈໍາປີ 2022 ຂອງຄະນະກວດກາສູນກາງພັກ; ບາງບັນຫາໃນຄໍາສັ່ງ ເລກທີ 268/ຄລສພ ກ່ຽວກັບການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ; ຄໍາສັ່ງແນະນໍາ ສະບັບເລກທີ 169/ຄລສພ, ລົງວັນທີ 15 ສິງຫາ 2022 ວ່າດ້ວຍການເພີ່ມທະວີນໍາພາ-ຊີ້ນໍາ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ; ບົດໂອ້ລົມຂອງປະທານຄະນະກວດກາສູນກາງພັກຕໍ່ກອງປະຊຸມວຽກງານກວດກາທົ່ວປະເທດ ປີ 2022.
