ຕອນເຊົ້າວັນທີ 23 ພຶດສະພາ 2022, ກົມກວດກາ ກະຊວງພາຍໃນ ໄດ້ເປີດກອງປະຊຸມຝຶກອົບຮົມວຽກງານກວດກາ ພັກ-ລັດ ຊຸດທີ III , ໂດຍການເປັນປະທານກ່າວເປີດຂອງສະຫາຍ ນາງ ທອງຈັນ ແກ້ວແສນຫອມ ກໍາມະການປະຈໍາພັກ, ປະທານກວດກາພັກ ກະຊວງພາຍໃນ ເຊິ່ງເປັນກຽດເຂົ້າຮ່ວມຂອງສະຫາຍ ວັນຄໍາ ໄຊວົງສັກ ກໍາມະການພັກ ຄະນະກວດກາສູນກາງພັກ, ຫົວໜ້າກົມຄົ້ນຄວ້າ ແລະ ວາລະສານກວດກາ ຄະນະກວດກາສູນກາງພັກ ແລະ ອົງການກວດກາແຫ່ງລັດ, ມີບັນດາສະຫາຍເລຂາໜ່ວຍພັກຫ້ອງການ, ບັນດາກົມ, ສະຖາບັນ, ສູນ ທີ່ສັງກັດຢູ່ກະຊວງພາຍໃນ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມທັງໝົດ 40 ສະຫາຍ, ຍິງ 13 ສະຫາຍ.

ໃນໂອກາດກ່າວເປີດກອງປະຊຸມ ສະຫາຍ ນາງ ທອງຈັນ ແກ້ວແສນຫອມ ໄດ້ຍົກໃຫ້ເຫັນວ່າວຽກງານຕິດຕາມ, ກວດກາ ແມ່ນວຽກງານໜຶ່ງທີ່ມີຄວາມສຳຄັນໃນບົດບາດການນໍາພາຂອງພັກ ແລະ ຄຸ້ມຄອງຂອງລັດ ຄືທັດສະນະຂອງພັກທີ່ກ່າວໄວ້ວ່າ “ບໍ່ມີການກວດກາ ກໍໝາຍຄວາມວ່າບໍ່ມີການນໍາພາ” ເພາະວ່າວຽກງານຕິດຕາມ, ກວດກາ ແມ່ນວຽກງານໜຶ່ງທີ່ຕິດພັນກັບທຸກຂົງເຂດວຽກງານ, ເປັນວຽກທີ່ຄະນະພັກຮັບຜິດຊອບໂດຍກົງ, ຕ້ອງເຮັດເປັນປົກກະຕິ ແລະ ຂາດບໍ່ໄດ້ສໍາລັບການນໍາພາຂອງພັກ ແລະ ການຄຸ້ມຄອງລັດ; ການກວດກາແມ່ນພາຫະນະທີ່ສໍາຄັນອັນໜຶ່ງທີ່ມີປະສິດທິຜົນ ເພື່ອແກ້ໄຂບັນຫາຕ່າງໆ ໃນການພົວພັນຢູ່ພາຍໃນພັກ, ອົງການຈັດຕັ້ງລັດ. ຍ້ອນເຫັນໄດ້ຄວາມສໍາຄັນ, ຄຸນປະໂຫຍດຂອງວຽກງານກວດກາ ແລະ ເພື່ອສ້າງຄວາມເຂັ້ມແຂງທາງດ້ານຄວາມຮູ້, ຄວາມສາມາດໃຫ້ແກ່ຜູ້ຮັບຜິດຊອບວຽກງານກວດກາ ພັກ-ລັດ ໃນການເຄື່ອນໄຫວວຽກງານກວດກາໃຫ້ມີປະສິດທິພາບ ແລະ ປະສິດທິຜົນສູງກວ່າເກົ່າ ກົມກວດກາ ກະຊວງພາຍໃນ ຈຶ່ງໄດ້ສົມທົບກັບອົງການກວດກາແຫ່ງລັດ ຈັດກອງປະຊຸມຝຶກອົບຮົມວຽກງານກວດກາ ໃຫ້ຜູ້ຮັບຜິດຊອງວຽກງານກວດກາ ພັກ-ລັດຢູ່ຫ້ອງການ, ບັນດາກົມ, ສະຖາບັນ, ສູນ ແລະ ບັນດາໜ່ວຍພັກທີ່ສັງກັດກະຊວງພາຍໃນ, ເພື່ອກໍາໄດ້ຫຼັກການ, ເນື້ອໃນ, ວິທີການ, ຂັ້ນຕອນຂອງການກວດກາ ແລະ ນໍາໃຊ້ເຂົ້າໃນການເຄື່ອນໄຫວວຽກງານຕົວຈິງຢູ່ໃນການຈັດຕັ້ງຂອງຕົນ.