ໃນໂອກາດທີ່ໄດ້ເຄື່ອນໄຫວຢ້ຽມຢາມແຂວງໄຊຍະບູລີ ວັນທີ 27 ກໍລະກົດ 2022 ທ່ານ ປອ ຄຳພັນ ພົມມະທັດ ກຳມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໃຫ້ກຽດໂອ້ລົມຕໍ່ຄະນະພັກ-ຄະນະນຳ ແລະ ຄະນະກວດກາເມືອງ 4 ເມືອງເໜຶອແຂວງໄຊຍະບູລີຄື: ເມືອງ ຫົງສາ, ເມືອງ ເງິນ, ເມືອງ ຊຽງຮ່ອນ ແລະ ເມືອງຄອບ

ກ່ອນທີ່ຈະມີການໂອ້ລົມ ທ່ານ ປອ ຄຳພັນ ພົມມະທັດ ໄດ້ຮັບຟັງການລາຍງານສະພາບ ລວມໂດຍຫຍໍ້ຂອງການເຄື່ອນໄຫວວຽກງານຢູ່ເມືອງຫົງສາຈາກທ່ານ ຄຳຫຼ້າ ຜິວວັນນາ ກຳມະການພັກແຂວງ, ເລຂາພັກເມືອງ, ເຈົ້າເມືອງ ເມືອງ ຫົງສາ ເຊິ່ງທ່ານໃຫ້ຮູ້ວ່າ ເມືອງຫົງສາ ພວມຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ, ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ, ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກເມືອງ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ; ພ້ອມກັນນີ້ ກໍຢູ່ໃນຊ່ວງເວລາທີ່ຊາວເມືອງຫົງສາ ພວມສ້າງຂະບວນການຮອບດ້ານ ໃນການຫ້າງຫາກະກຽມໃຫ້ແກ່ ການດໍາເນີນກອງປະຊຸມກາງສະໄໝ ຂອງອົງຄະນະພັກເມືອງຫົງສາ ຢ່າງເປັນຂະບວນຟົດຟື້ນ; ດ້ານເສດຖະກິດສຸມໃສ່ ຈັດຕັ້ງປະຕິບັດມາດຕະການຈຸດສຸມ ຂອງວາລະແຫ່ງຊາດ ວ່າດ້ວຍການແກ້ໄຂ ຄວາມຫຍຸງຍາກທາງດ້ານເສດຖະກິດ-ການເງິນຕາມຄວາມຮັບຜິດຊອບ ຕາມການແບ່ງຂັ້ນຄຸ້ມຄອງຂອງເມືອງ, ເຮັດໃຫ້ເສດຖະກິດມະຫາພາກຂອງເມືອງ ໄດ້ສືບຕໍ່ຂະຫຍາຍຕົວຕໍ່ເນື່ອງ ລວມຍອດລາຍໄດ້ທັງໝົດ 752,74 ຕື້ກີບ ລາຍໄດ້ສະເລ່ຍຕໍ່ຫົວຄົນໜຶ່ງໄດ້ 24,5 ລ້ານກີບ ເທົ່າກັບ 2.556 ໂດລາສະຫະລັດຕໍ່ຄົນຕໍ່ປີ, ໃນນີ້ ລາຍຮັບກະສິກໍາ ແລະ ປ່າໄມ້ ກວມເອົາ 28%, ອຸດສາຫະກໍາ-ຫັດຖະກໍາ ກວມເອົາ 27%, ການບໍລິການ ກວມເອົາ 45%, ການຜະລິດກະສິກໍາ ໄດ້ມີຄວາມໝັ້ນທ່ຽງທາງດ້ານສະບຽງອາຫານ ໂດຍສະເພາະການຜະລິດເຂົ້າ, ການລ້ຽງສັດແບບເປັນກຸ່ມເປັນຟາມ ເພື່ອສະໜອງຊີ້ນ, ປາ ໃຫ້ແກ່ການບໍລິໂພກ ໄດ້ມີການຂະຫຍາຍຕົວ ແລະ ມີທ່າອ່ຽງເພີ່ມຂຶ້ນ ເປັນຕົ້ນແມ່ນການລ້ຽງງົວ-ຄວາຍ ຕິດພັນກັບການປູກຫຍ້າ ແລະ ການລ້ຽງໄກ່ພັນໄຂ່; ດ້ານວຽກງານກວດກາພັກໃນ 6 ເດືອນຜ່ານມາ ກວດກາພົບເຫັນກໍລະນີຄະນະພັກ, ສະມາຊິກພັກ ເຄື່ອນໄຫວຜິດຕໍ່ກົດລະບຽບຂອງພັກ 6 ກໍລະນີ ຈໍານວນ 38 ສະຫາຍ, ຍິງ 11 ສະຫາຍ ຄື: ພົວພັນຢາເສບຕິດ 2 ສະຫາຍ, ສວຍໃຊ້ສິດເພື່ອຜົນປະໂຫຍດສ່ວນຕົວ 1 ສະຫາຍ, ລະເມີດກົດໝາຍວ່າດ້ວຍປ່າໄມ້ 2 ສະຫາຍ, ພົວພັນສັງຄົມຊູ້ສາວ 2 ສະຫາຍ, ຂາດຄວາມເປັນແບບຢ່າງຂຽນໃບສໍາຫຼວດ 4 ສະຫາຍ, ຍິງ 1 ສະຫາຍ, ກ່າວເຕືອນ 27 ສະຫາຍ, ຍິງ 10 ສະຫາຍ; ໃນນີ້, ລຶບຊື່ອອກຈາກພັກ 7 ສະຫາຍ, ດ້ານວຽກງານກວດກາລັດໄດ້ກວດກາພົບເຫັນພະນັກງານ ແລະ ເຈົ້າໜ້າທີ່ຂອງລັດ ເຄື່ອນໄຫວຜິດຕໍ່ກົດໝາຍ 19 ຄົນ, ຍິງ 8 ຄົນ, ໃນນີ້, ເອົາອອກຈາກການເປັນພະນັກງານ 1 ຄົນ, ຂຽນໃບສໍາຫຼວດ 7 ຄົນ, ຍິງ 1 ຄົນ, ກ່າວເຕືອນ 11 ຄົນ, ຍິງ 7 ຄົນ.

ພາຍຫຼັງທີ່ໄດ້ຮັບຟັງການລາຍງານ ທ່ານ ປອ ຄຳພັນ ພົມມະທັດ ໄດ້ສະແດງຄວາມຊົມເຊີຍຕໍ່ຄະນະພັກ, ຄະນະນຳຂອງເມືອງຫົງສາ ທີ່ໄດ້ສຸມໃສ່ໃນການຈັດຕັ້ງປະຕິບັດວຽກງານເຊິ່ງມີຜົນສຳເລັດຫຼາຍດ້ານ. ພ້ອມນັ້ນ ເພິ່ນໄດ້ໂອລົມ ແລະ ມີຄຳເຫັນແລກປ່ຽນຕໍ່ ຄະນະພັກ, ຄະນະນຳ 4 ເມືອງເໜຶອ ຂອງແຂວງໄຊຍະບູລີ ເປັນຕົ້ນແມ່ນການຈັດຕັ້ງປະຕິບັດ 2 ວາລະແຫ່ງຊາດກໍ່ຄືການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ແລະ ການຈັດຕັ້ງປະຕິບັດວຽກງານກວດກາ; ດ້ານເສດຖະກິດແມ່ນໃຫ້ສົ່ງເສີມໃຫ້ມີພໍ່ຄ້າຄົນກາງເພື່ອສ້າງຄວາມເຕີບໂຕທາງດ້ານເສດຖະກິດ,ໃຫ້ຂະຫຍາຍຖັນແຖວຄອບຄົວຕົວແບບ, ກຸ່ມຜູ້ປະກອບການໃນເຂດຊຸມຊົນໃນແຕ່ລະຂົງເຂດໂດຍສະເພາະຂົງເຂດປຸງແຕ່ງ, ຂົງເຂດຜະລິດ, ການຂົນສົ່ງ, ການສ້າງແບຣນຜະລິດຕະພັນຈົດລິຂະສິດເພື່ອເພີ່ມມູນຄ່າ, ມີການອອກແບບຜະລິດຕະພັນໃຫ້ຫຼາກຫຼາຍສີສັນ; ການແກ້ໄຂບັນຫາຢາເສບຕິດແມ່ນໃຫ້ເຂັ້ມງວດ, ແກ້ໄຂໃນການບໍາບັດຜູ້ເສບເພື່ອຫຼຸດຜ່ອນຄວາມຕ້ອງການໃນການຊື້-ຂາຍ, ໃຫ້ຄຸ້ມຄອງລູກຫຼານເພື່ອສະກັດກັ້ນບໍ່ໃຫ້ມີການຊື້-ຂາຍ, ສ້າງຄວາມເຂັ້ມແຂງ, ປອດໃສພາຍໃນການຈັດຕັ້ງທຸກຂັ້ນ, ປຸກລະດົມໃຫ້ພໍ່ແມ່ປະຊາຊົນເປັນຫູເປັນຕາ ຊ່ວຍເຈົ້າໜ້າທີ່ໃນການຕິດຕາມ, ກວດກາລູກຫຼານຂອງຕົນ; ສຳລັບວຽກງານກວດກາແມ່ນໃຫ້ຄະນະພັກແຕ່ລະຂັ້ນເຂົ້າໃຈເປັນເອກະພາບສູງ: ນັບແຕ່ການແກ້ໄຂຜົນການກວດກາ, ການຕິດຕາມ, ກວດກາປົກກະຕິຕໍ່ເນື່ອງແຕ່ຫົວທີ ແມ່ນເນື້ອໃນແບບແຜນທີ່ຂາດບໍ່ໄດ້ໃນການນຳພາຂອງຄະນະພັກແຕ່ລະຂັ້ນ, ທັງຖືການຕີຖອຍ ແລະ ສະກັດກັ້ນບັນດາປະກົດການຫຍໍ້ທໍ້ພາຍໃນພັກ, ສ້າງການຫັນປ່ຽນຢ່າງແຂງແຮງ, ຮອບດ້ານ ແລະ ເລິກເຊິ່ງ, ຜູ້ເຮັດວຽກງານກວດກາຕ້ອງກຳສະພາບໃຫ້ໄດ້; ເອົາໃຈໃສ່ຕ້ານສະກັດກັ້ນການສໍ້ລາດບັງຫຼວງ, ເລັ່ງທວງເພື່ອໃຫ້ເຫັນໄດ້ບົດບາດຄວາມສຳຄັນ ແລະ ຖືເອົາການສະກັດກັ້ນຕີຖອຍການສວຍໃຊ້ໜ້າທີ່ຕໍາແໜ່ງເພື່ອຫາຜົນປະໂຫຍດໃນຖັນແຖວສະມາຊັກພັກ-ພະນັກງານ ທຸກລະດັບນັບແຕ່ຂັ້ນບ້ານຂຶ້ນມາ. ນອກນີ້ຍັງໄດ້ໄປຢ້ຽມຢາມໂຮງໄຟຟ້າພະລັງງານຄວາມຮ້ອນຫົງສາ, ໂຮງງານ ຜະລິດແຜ່ນຍິບຊຳເມືອງຫົງສາ, ຢ້ຽມຊົມຜະລິດຕະພັນຜ້າຫ່ອມຍ້ອມນິນສິນຄ້າໂອດ໊ອບຂອງເມືອງຢູ່ບ້ານວຽງແກ້ວ ແລະ ສະຫະກອນສົ່ງເສີມກະສິກຳ ຢູ່ຫ້ອງການພາກສະໜາມ ບໍລິສັດ ໄຟຟ້າຫົງສາ ຈຳກັດ ຕື່ມອີກ.