ຄະນະຮັບຜິດຊອບຕິດຕາມ, ກວດກາ ໂຄງການລົງທຶນຂອງລັດເລີ່ມແຕ່ຫົວທີຂັ້ນເມືອງ, ເຈົ້າຂອງໂຄງການ ແລະ ອົງການກວດກາລັດແຂວງ ໄດ້ປະຊຸມປຶກສາຫາລື, ແນະນໍາກ່ຽວກັບວິທີ, ຂັ້ນຕອນການລົງຕິດຕາມ, ກວດກາ ຕາມດໍາລັດ ແລະ ຄໍາແນະນໍາ. ຈາກນັ້ນ ໄດ້ລົງຢ້ຽມຢາມການຈັດຕັ້ງປະຕິບັດໜ້າວຽກຕົວຈິງໃນພາກສະໝາມ, ພາຍຫຼັງສໍາເລັດການລົງຢ້ຽມຢາມພາກສະໝາມແລ້ວ ກໍໄດ້ກັບມາເຮັດວຽກຮ່ວມກັບບໍລິສັດ. ເຊິ່ງທ່ານ ນາງ ຄໍາແພງ ໄຊສະໜາມ ເຈົ້າຂອງບໍລິິສັດໄຊສະໝາມ ກໍ່ສ້າງ ແລະ ສ້ອມແປງຄົບວົງຈອນ ຈໍາກັດ ໄດ້ໃຫ້ກຽດຕ້ອນຮັບ ແລະ ລາຍງານຫຍໍ້ກ່ຽວກັບ ໂຄງການສ້ອມແປງທາງ ເລກທີ 3112 ແຕ່ບ້ານຫ້ວຍທາກ ຫາ ບ້ານແກ້ງຮາງ ວ່າ: ເສັ້ນທາງດັ່ງກ່າວມີລວງກ້ວາງ 5 ແມັດ, ລວງຍາວ 23 ກມ, ມູນຄ່າສັນຍາຂອງໂຄງການແມ່ນ 4.985.000.000 ກີບ (ທຶນຂອງລັດ 100%) ໂດຍແມ່ນຫ້ອງການໂຍທາທິການ ແລະ ຂົນສົ່ງເມືອງເປັນເຈົ້າຂອງໂຄງການ ແລະ ຜູ້ຮັບເໝົາກໍ່ສ້າງໂດຍບໍລິສັດ ໄຊສະໝາມກໍ່ສ້າງ-ສ້ອມແປງຄົບວົງຈອນ ໄລຍະເວລາຈັດຕັ້ງປະຕິບັດຕາມສັນຍາ ເລີ່ມແຕ່ວັນທີ 26 ພຶດສະພາ 2025 ຫາ ວັນທີ 26 ເມສາ 2026. ພ້ອມດຽວກັນນັ້ນ ອົງການກວດກາລັດເມືອງ ກໍ່ຍັງໄດ້ຜ່ານດໍາລັດສະບັບເລກທີ 01/ລບ, ລົງວັນທີ 6 ມັງ ກອນ 2015 ຂອງລັດຖະບານ ວ່າດ້ວຍການຕິດຕາມ, ກວດກາໂຄງການລົງທຶນຂອງລັດ ເລີ່ມແຕ່ຫົວທີ ແລະ ຄໍາແນະນໍາຂອງທ່ານ ເຈົ້າເມືອງຈອມເພັດ ສະບັບເລກທີ 05/ຈມ-ຈພ, ລົງວັນທີ 26 ກຸມພາ 2025 ວ່າດ້ວຍການຕິດຕາມ ກວດກາໂຄງການລົງທຶນຂອງລັດ ເລີ່ມແຕ່ຫົວທີຢູ່ເມືອງຈອມເພັດ.

ໃນຕອນທ້າຍ ທ່ານ ສົມເພັດ ສຸຂະເສີມ ກໍາມະການປະຈໍາພັກເມືອງ ປະທານອົງການກວດກາລັດເມືອງ ກໍໄດ້ມີຄໍາເຫັນຊີ້ນໍາ ໂດຍເນັ້ນໃຫ້ເຈົ້າຂອງໂຄງການ, ບໍລິສັດຜູ້ເໝົາ ເອົາໃຈໃສ່ໃນການຈັດ ຕັ້ງປະຕິບັດຕາມດໍາລັດ 01/ລບ ແລະ ສ້ອມແປງເສັ້ນທາງດັ່ງກ່າວ ໃຫ້ສໍາເລັດຕາມສັນຍາທີ່ກໍານົດໄວ້.