ໃນວັນທີ 18 ກັນຍາ 2025, ຄະນະກວດກາພັກເມືອງສະໜາມໄຊ ແຂວງ ອັດຕະປື ໄດ້ເຄື່ອນໄຫວຊຸກຍູ້ການດໍາເນີນຊີວິດການເມືອງ ແລະ ເຜີຍແຜ່ ບາງເອກະສານ ກ່ຽວກັບ ວຽກງານກວດກາພັກ ໃຫ້ແກ່ໜ່ວຍພັກຮາກຖານ ບ້ານປາກບໍ່, ໂດຍການເປັນປະທານຂອງສະຫາຍ ຈັນທະພອນ ຈ່ອຍຄຳລຽນ ຄະນະປະຈໍາພັກເມືອງ ປະທານຄະນະກວດກາພັກ-ອົງການກວດກາລັດ ແລະ ຕ້ານການສໍ້ລາດບັງຫຼວງເມືອງ, ມີສະຫາຍ ຄໍາຕັນ ໄຊຍະລາດ ຮອງປະທານຄະນະກວດກາພັກເມືອງ, ສະຫາຍ ບັນດິດ ພວງປະເສີດ ເລຂາໜ່ວຍພັກບ້ານປາກບໍ່ ພ້ອມດ້ວຍຄະນະທີມງານທີ່ລົງຊຸກຍູ້ ຕະຫຼອດຮອດສະມາຊິກພັກ ເຂົ້າຮ່ວມທັງໝົດ 22 ສະຫາຍ, ຍິງ 03 ສະຫາຍ.ໃນກອງປະຊຸມ, ສະຫາຍ ບັນດິດ ພວງປະເສີດ ໄດ້ລາຍງານການຈັດຕັ້ງປະຕິບັດວຽກການນໍາພາ - ຊີ້ນໍາ ໃນໄລຍະຜ່ານມາໂດຍຫຍໍ້. ຈາກນັ້ນ, ສະຫາຍ ຈັນທະພອນ ຈ່ອຍຄຳລຽນ ແລະ ຄະນະທີມງານ ກໍໄດ້ຜັດປ່ຽນກັນ ເຜີຍແຜ່ເອກະສານ ກ່ຽວກັບ ຄຳສັ່ງແນະນຳ ເລກທີ 169/ຄລສພ ຂອງຄະນະເລຂາທິການສູນກາງພັກ ວ່າດ້ວຍການເພີ່ມທະວີ ການນຳພາ-ຊີ້ນຳ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ; ຄຳແນະນຳ ເລກທີ 379/ຄກສພ ກ່ຽວກັບ ການປັບປຸງການຈັດຕັ້ງ ຄະນະກວດກາພັກ ແລະ ອົງການກວດກາລັດແຕ່ລະຂັ້ນ; ພ້ອມທັງແນະນຳ ແບບແຜນ ວິທີເຮັດວຽກໃຫ້ຜູ້ຮັບຜິດຊອບ ວຽກງານກວດກາພັກ ແລະ ຂໍ້ຫ້າມຂອງສະມາຊິກພັກ ໃຫ້ສະມາຊິກພັກ ມີຄວາມຮັບຮູ້ເຂົ້າໃຈຂຶ້ນຕື່ມ. ພ້ອມດຽວກັນ, ສະມາຊິກພັກພາຍໃນໜ່ວຍພັກບ້ານ ກໍ່ໄດ້ມີການແລກປ່ຽນບົດຮຽນຕໍານິສົ່ງຂ່າວຊ່ວຍເຫຼືອເຊິ່ງກັນ ແລະ ກັນ, ສົນທະນາແລກປ່ຽນບົດຮຽນຮ່ວມກັບ ຄະນະທີມງານທີ່ລົງເຄື່ອນໄຫວຊຸກຍູ້ໃນຄັ້ງນີ້ອີກດ້ວຍ.