ວັນທີ 22 ກໍລະກົດ 2025 ຄະນະກວດກາພັກ-ອົງການກວດກາລັດ ແຂວງຜົ້ງສາລີ ໄດ້ຈັດກອງປະຊຸມເຜີຍແຜ່ວຽກງານສະກັດກັ້ນ, ກວດກາ, ສືບສວນ-ສອບສວນ ການສໍ້ລາດບັງຫລວງ, ການຟອກເງິນທີ່ຕິດພັນກັບການສໍ້ລາດບັງຫຼວງໂດຍການເປັນປະທານ ຂອງທ່ານ ບຸນທະວີ ສໍສຸກັນ ຄະນະປະຈໍາພັກແຂວງ, ປະທານຄະນະກວດກາພັກ - ອົງການກວດກາລັດແຂວງຜົ້ງສາລີ, ມີທ່ານ ສູນທະລາ ເຂັມພິລາດ ຮອງຫົວໜ້າກົມຕ້ານ ແລະສອບສວນການສໍ້ລາດບັງຫຼວງ ຈາກອົງການກວດກາແຫ່ງລັດ, ບັນດາຫົວໜ້າພະແນກ, ຮອງຫົວໜ້າພະແນກອ້ອມຂ້າງແຂວງ, ປະທານ, ຮອງປະທານກວດກາ ເມືອງບຸນເໜືອ, ກອງບັນຊາການ ປກຊ - ປກສແຂວງ, ອໍານວຍການໂຮງຮຽນ, ໂຮງໝໍ, ລັດວິສາຫະກິດ ຕະຫລອດຮອດພະນັກງານ ວິຊາການອອ້ມຂ້າງແຂວງເຂົ້າຮ່ວມ.ໃນກອງປະຊຸມ ທ່ານ ໂລ ອາຍິງ ຮອງປະທານກວດກາພັກ-ລັດແຂວງ ໄດ້ກ່າວເປີດກອງປະຊຸມຢ່າງເປັນທາງການ. ຈາກນັ້ນ ຄະນະທິມງານມາຈາກກົມຕ້ານ ແລະ ສອບສວນການສໍ້ລາດບັງຫຼວງ ໄດ້ເຜີຍແຜ່ເອກະສານ ວຽກງານການສະກັດກັ້ນ ການສໍ້ລາດບັງຫລວງ; ການກວດກາ ການສໍ້ລາດບັງຫຼວງ ແລະ ການຟອກເງິນທີ່ຕິດພັນກັບການສໍ້ລາດບັງຫຼວງ; ການສືບສວນ-ສອບສວນ ການສໍ້ລາດບັງຫລວງ ແລະ ການຟອກເງິນ ທີ່ຕິດພັນກັບການສໍ້ລາດ ບັງຫຼວງ; ການແຈ້ງຊັບສິນ ແລະ ລາຍຮັບຂອງພະນັກງານ. ຈາກນັ້ນຜູ້ເຂົ້າຮ່ວມກອງປະຊຸມ ແຕ່ລະພາກສ່ວນກໍໄດ້ປະກອບຄຳເຫັນ ເພື່ອເປັນການແລກປ່ຽນບົດຮຽນຢ່າງກົງໄປ-ກົງມາຕໍ່ກັບວຽກງານສະກັດກັ້ນ ກວດກາ, ສືບສວນ-ສອບສວນການສໍ້ລາດ ບັງຫຼວງ, ການຟອກເງິນທີ່ຕິດພັນກັບການສໍ້ລາດ ບັງຫລວງ ແລະ ການແຈ້ງຊັບສິນແຈ້ງລາຍຮັບ ຂອງພະນັກງານ ທີ່ເກີດຂຶ້ນຢູ່ໃນປັດຈຸບັນຢ່າງຟົດຟື້ນ. ພ້ອມນີ້ ທ່ານ ສູນທະລາ ເຂັມພິລາດ ກໍ່ໄດ້ຊີ້ແຈງ ແລະ ຕອບຂໍ້ຂ້ອງໃຈບາງບັນຫາ ທີ່ຜູ້ເຂົ້າຮ່ວມກອງປະຊຸມຍົກຂຶ້ນ ຢ່າງຈະແຈ້ງ ແລະ ເຂົ້າໃຈເລິກເຊິ່ງ.