ໃນວັນທີ 26 ມິຖຸນາ 2025, ຢູ່ທີ່ຫ້ອງປະຊຸມຂອງຄະນະກວດກາພັກ ແຂວງຫຼວງພະບາງ ຄະນະກຳມະການກວດກາລະບຽບວິໄນພັກ ແຂວງຢຸນນານ ນຳໂດຍ ສະຫາຍ ເຟີງ ຈື້ລີ ຄະນະປະຈໍາພັກແຂວງ, ເລຂາຄະນະກໍາມະການກວດກາວິໄນພັກ ແລະ ຫົວໜ້າຄະນະກຳມະການກວດກາລັດ ແຂວງ ຢຸນນານ ສປ ຈີນ ພ້ອມດ້ວຍຄະນະ ໄດ້ເຂົ້າພົບປະແລກປ່ຽນບົດຮຽນ ກັບ ຄະນະກວດກາພັກ,​ ອົງການກວດກາລັດແຂວງຫຼວງພະບາງ. ໂດຍມີ ສະຫາຍ ໄຊຄໍາ ອຸ່ນມີໄຊ ຮອງປະທານຄະນະກວດກາສູນກາງພັກ, ຮອງປະທານ ອົງການກວດກາແຫ່ງລັດ ແລະ ສະຫາຍ ຄຳຫຼ້າ ລຽນປະດິດ ກຳມະການປະຈຳພັກແຂວງ, ປະທານ ຄະນະກວດກາ ພັກ-ລັດ ແຂວງຫຼວງພະບາງ ພ້ອມດ້ວຍຄະນະເຂົ້າຮ່ວມ.ນພິທີ ສະຫາຍ ຄຳຫຼ້າ ລຽນປະດິດ ກໍ່ໄດ້ສະແດງຄວາມຍິນດີຕ້ອນຮັບ ຕໍ່ການມາຢ້ຽມຢາມ ແລະ ພົບປະແລກປ່ຽນບົດຮຽນ ຂອງຄະນະກໍາມະການກວດກາວິໄນພັກ ແຂວງຢຸນນານ ແຫ່ງ ສປ. ຈີນ ໃນຄັ້ງນີ້ ເຊິ່ງເປັນການຜັນຂະຫຍາຍແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາລາວ-ຈີນ ຈີນ-ລາວ, ພ້ອມທັງລາຍງານສະພາບລວມ, ແຜນພັດທະນາເສດຖະກິດຂອງແຂວງ ເວົ້າລວມ, ເວົ້າສະເພາະ ການເຄື່ອນໄຫວວຽກງານກວດກາພັກ, ກວດກາລັດ ແລະ ວຽກງານສະກັດກັ້ນ-ຕ້ານການສໍ້ລາດບັງຫຼວງ, ພ້ອມທັງສະເໜີໃຫ້ທັງສອງຝ່າຍມີການພົບປະແລກປ່ຽນບົດຮຽນວຽກງານກວດກາ 2 ປີ/ຄັ້ງ ເພື່ອຖອດຖອນບົດຮຽນນໍາມາໝູນໃຊ້ໃຫ້ເກີດດອກອອກຜົນ ແລະ ໃຫ້ມີການຈັດຝຶກອົບຮົມໄລຍະສັ້ນທາງດ້ານວິຊາສະເພາະ ເປັນຕົ້ນແມ່ນວຽກງານກວດກາພັກ, ກວດກາລັດ, ຕ້ານການສໍ້ລາດບັງຫຼວງ ເພື່ອເຮັດໃຫ້ຄະນະກວດກາພັກ-ລັດແຂວງຫຼວງພະບາງ ມີຄວາມເຂັ້ມແຂງສູງຂຶ້ນຕື່ມອີກ. ພ້ອມດຽວກັນນັ້ນ, ທັງສອງຝ່າຍກໍ່ໄດ້ມີການແລກປ່ຽນບົດຮຽນ ຢ່າງກົງໄປກົງມາເປັນຕົ້ນແມ່ນ ວຽກງານການຕິດຕາມ, ກວດກາ ຄະນະພັກ, ການຈັດຕັ້ງພັກ ແລະ ສະມາຊິກພັກ ໃນການຈັດຕັ້ງປະຕິບັດບັນດາຂໍ້ຫ້າມຂອງພັກ, ການສະກັດກັ້ນ ແລະ ຕ້ານການສໍ້ລາດບັງຫຼວງ ຂອງພະນັກງານ-ລັດຖະກອນ ໃຫ້ມີຄວາມໂປ່ງໃສ ແລະ ໄດ້ຮັບຜົນດີ.ໃນຕອນທ້າຍ ສະຫາຍ ຄຳຫຼ້າ ລຽນປະດິດ ຍັງໄດ້ອວຍພອນໃຫ້ສາຍພົວພັນມິດຕະພາບ, ການຮ່ວມມືຍຸດທະສາດຮອບດ້ານ ແລະ ຄູ່ຮ່ວມຊະຕາກຳ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ຈີນ-ລາວ ຈົ່ງໝັ້ນຄົງທະນົງແກ່ນ ແລະ ສວຍສົດງົດງາມຕະຫຼອດກາລະນາ; ພ້ອມທັງອວຍພອນໃຫ້ການພົວພັນຮ່ວມມື ລະຫວ່າງ ສອງອົງການກວດກາ ຈົ່ງສືບຕໍ່ຂະຫຍາຍຕົວໄປສູ່ລວງເລິກ, ໜັກແໜ້ນ ແລະ ມີປະສິດທິຜົນຍິ່ງໆຂຶ້ນ.