ໃນວັນທີ 18 ມິຖຸນາ 2025 ນີ້, ໜ່ວຍພັກຮາກຖານຄະນະກວດກາພັກແຂວງ ເຊກອງ ໄດ້ຈັດກອງປະຊຸມສະມາຊິກພັກ ເພື່ອເລືອກເອົາຜູ້ແທນສົມບູນ ແລະ ສໍາຮອງ ເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງເຊກອງ ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການແຂວງ ໂດຍການເປັນປະທານຂອງສະຫາຍ ນາງ ສີສະຫງ່າ ແກ້ວດວງດີ ຄະນະປະຈຳພັກແຂວງ, ວ່າການ ປະທານຄະນະກວດກາພັກແຂວງ, ມີບັນດາສະຫາຍສະມາຊິກພັກ, ພ້ອມດ້ວຍຄະນະຮັບຜິດຊອບຂັ້ນແຂວງເຂົ້າຮ່ວມ.ໂອກາດນີ້, ນາງ ສີສະຫງ່າ ແກ້ວດວງດີ ໄດ້ເນັ້ນໃຫ້ຄະນະພັກ, ສະມາຊິກພັກທຸກສະຫາຍ ເອົາໃຈໃສ່ຄົ້ນຄວ້າ ພິຈາລະນາຢ່າງເລິກເຊິ່ງໃນການປ່ອນບັດຄັດເລືອກເອົາຜູ້ແທນສົມບູນ ແລະສໍາຮອງ ຜູ້ທີ່ມີມາດຖານເງື່ອນໄຂຄົບຖ້ວນ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ເປັນແບບຢ່າງນໍາໜ້າໃນການປະຕິບັດໜ້າທີ່ການເມືອງ ດ້ວຍຄວາມຮັບຜິດຊອບສູງ, ມີສຸຂະພາບແຂງແຮງດີ, ຊຶ່ງຜູ້ແທນສົມບູນ ແລະສໍາຮອງ ທີ່ຈະເຂົ້າຮ່ວມກອງປະຊຸມໃຫຍ່ອົງ ຄະນະພັກແຂວງ ຕ້ອງໄດ້ຮັບການເລືອກຈາກສະມາຊິກພັກ ແຕ່ 50% ຂຶ້ນໄປ.ຈາກນັ້ນ, ສະຫາຍ ດາຊີ ສຸວັນນະສາຍ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານມາດຖານ, ເງື່ອນໄຂ ຂອງຜູ້ແທນສົມບູນ, ຜູ້ແທນສໍາຮອງ, ຫຼັງຈາກນັ້ນ ກໍ່ໄດ້ດຳເນີນການປ່ອນບັດເລືອກເອົາຜູ້ແທນສົມບູນ ແລະສໍາຮອງ ຊຶ່ງເລືອກໄດ້ ສະຫາຍ ອ່ອນມະນີວັນ ຈັນດາວົງ, ສະຫາຍ ສົມສະຫວັນ ຊຸມພົນພັກດີ ເປັນຜູ້ແທນສົມບູນ ແລະ ເລືອກໄດ້ ສະຫາຍ ນາງ ແສງມະນີ ໄຊສົງຄາມ ເປັນຜູ້ແທນສໍາຮອງ ເພື່ອເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງ ທີ່ຈະໄຂຂຶ້ນໃນເດືອນສິງຫານີ້.