ໃນກອງປະຊຸມສະຫາຍ ຄໍາຜາຍ ສຸລິຂັນ ໄດ້ຂຶ້ນກ່າວເປີດກອງປະຊຸມ, ເຊິ່ງທ່ານໄດ້ເນັ້ນໜັກໃຫ້ບັນດາຜູ້ແທນທີ່ເຂົ້າຮ່ວມກອງປະຊຸມ ທຸກສະຫາຍຈົ່ງພ້ອມກັນເອົາໃຈໃສ່ ຮັບຟັງການບັນຍາຍບັນດາຫົວຂໍ້ເອກະສານ ຂອງທີມງານທີ່ມາຈາກຄະນະກວດກາສູນກາງ ເປັນຕົ້ນແມ່ນ ເອກະສານຄວາມຮູ້ພື້ນຖານ ກ່ຽວກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ, ເອກະສານ ຄວາມຮູ້ພື້ນຖານກ່ຽວກັບວຽກງານກວດກາການສໍ້ລາດບັງຫຼວງ, ວຽກງານສືບສວນ-ສອບສວນການສໍ້ລາດບັງຫຼວງ ແລະ ເອກະສານ ກ່ຽວກັບວຽກງານແຈ້ງຊັບສິນ ແລະ ລາຍຮັບຂອງພະນັກງານ-ລັດຖະກອນ. ເພື່ອເຮັດໃຫ້ຜູ້ເຂົ້າຮ່ວມກອງປະຊຸມຮັບຮູ້ ແລະ ເຂົ້າໃຈຕໍ່ວຽກງານດັ່ງກ່າວຢ່າງເລິກເຊິ່ງ ແລະ ໃຫ້ຕີລາຄາຄືນ ຕໍ່ກັບການຈັດຕັ້ງປະຕິບັດວຽກງານກວດກາ ໃນຂົງເຂດຄວາມຮັບຜິດຊອບຂອງຕົນໃນໄລຍະຜ່ານມາກ່ຽວກັບບັນຫາທີ່ຍັງກົດໜ່ວງ, ຖ່ວງດຶງ, ອັດຕັນ ແລະ ສິ່ງທີ່ເປັນອຸປະສັກຕໍ່ການເຄື່ອນໄຫວວຽກງານກວດກາ ເພື່ອພ້ອມກັນແກ້ໄຂໃຫ້ຖືກຕ້ອງ, ມີຄວາມສັກສິດໃນການຄຸ້ມຄອງລັດ ແລະ ສາມາດຮັກສາຊັບສົມບັດຂອງລັດ, ຂອງລວມໝູ່ບໍ່ໃຫ້ຕົກເຮ່ຍເສຍຫາຍ, ເກັບກູ້ເອົາຊັບສິນຂອງລັດທີ່ຖືກບຸກຄົນຈຳນວນໜຶ່ງສວຍໃຊ້ໜ້າທີ່ຕໍາແໜ່ງສໍ້ລາດບັງຫຼວງຄືນມາໃຫ້ແກ່ລັດ, ພ້ອມກັນນີ້ກໍເປັນການປັບປຸງແກ້ໄຂດ້ານອ່ອນ, ຂໍ້ຂາດຕົກບົກຜ່ອງ ຂອງແຕ່ລະສະຫາຍທີ່ເຮັດວຽກກວດກາ.

ໂອກາດດຽວກັນນີ້ ສະຫາຍ ບຸນທັນ ປອນວັນນາ ກໍໄດ້ມີຄຳເຫັນແນະນຳບາງບັນຫາຕໍ່ກອງປະຊຸມເຜີຍແຜ່ນິຕິກໍາໃນຄັ້ງນີ້ ເປັນຕົ້ນ ໃຫ້ຜູ້ເຮັດວຽກງານກວດກາພາຍໃນເມືອງເອົາໃຈໃສ່ມີຄວາມຮັບຜິດຊອບຕໍ່ໜ້າທີ່ການເມືອງ;ມີແບບແຜນວິທີເຮັດວຽກ, ແບບແຜນການດໍາລົງຊີວິດ ແລະ ຮຽກຮ້ອງໃຫ້ບັນດາສະຫາຍທີ່ເຂົ້າຮ່ວມກອງປະຊຸມເອົາໃຈໃສ່ຄົ້ນຄ້ວາ ແລະ ນໍາເອົາບົດຮຽນໃນຄັ້ງນີ້ໄປຜັນຂະຫຍາຍເຂົ້າໃນການຈັດຕັ້ງປະຕິບັດໃຫ້ມີປະສິດທິຜົນສູງ.