ໃນວັນທີ 23 ພຶດສະພາ 2025 ຢູ່ທີ່ສະໂມສອນເມືອງໄຊ ແຂວງອຸດົມໄຊ ໄດ້ເປີດກອງປະຊຸມ ວຽກງານກວດກາ ປະຈໍາປີ 2024 ແລະ ທິດທາງແຜນການ, ຄາດໝາຍສູ້ຊົນປະຈໍາປີ 2025. ພາຍໃຕ້ການເປັນປະທານຂອງທ່ານ ບຸນທອງ ບຸນໄຊທິບ ຄະນະປະຈຳພັກເມືອງ ປະທານກວດກາພັກ-ລັດ ເມືອງ, ເປັນກຽດເຂົ້າຮ່ວມມີທ່ານ ວາລີ ຈືນໍເຢັງ ກຳມະການພັກແຂວງ ປະທານກວດກາພັກ-ລັດ ແຂວງອຸດົມໄຊ, ມີບັນດາສະຫາຍຄະນະປະຈຳພັກເມືອງ, ກຳມະການພັກເມືອງ, ປະທານກວດກາຄະນະພັກຮາກຖານ, ປະທານກວດກາໜ່ວຍພັກ ແລະ ຜູເຮັດວຽກງານກວດກາໜ່ວຍພັກຫ້ອງການອ້ອມຂ້າງ, ບ້ານເທດສະບານ ແລະ ໜ່ວຍພັກໂຮງຮຽນ ເທດສະບານ ເຂົ້າຮ່ວມ. ກອງປະຊຸມໄດ້ຜ່ານຮ່າງບົດສະຫຼຸບວຽກງານກວດກາປະຈໍາປີ 2024 ແລະ ທິດທາງແຜນການ ປະຈໍາປີ 2025 ຂອງຄະນະກວດກາເມືອງໄຊ; ເຜີຍແຜ່ບັນດາເອກະສານທີ່ຕິດພັນກັບວຽກງານກວດກາເປັນຕົ້ນແມ່ນ ບົດບັນທຶກການປະສານງານລະຫວ່າງອົງການກວດກາແຫ່ງລັດ ກັບອົງການກວດສອບແຫ່ງລັດ; ບົດບັນທຶກການປະສານງານລະຫວ່າງສານປະຊາຊົນສູງສຸດ ກັບ ອົງການກວດກາແຫ່ງລັດ ກ່ຽວກັບການດໍາເນີນຄະດີ; ບົດບັນທຶກການປະສານງານລະຫວ່າງອົງການກວດກາແຫ່ງລັດ ກັບ ກະຊວງປ້ອງກັນຄວາມສະຫງົບ, ກະຊວງຍຸຕິທໍາ ແລະ ອົງການໄອຍະການປະຊາຊົນສູງສຸດ ໃນການດໍາເນີນຄະດີ ການສໍ້ລາດບັງຫຼວງ, ບົດບັນທຶກ ການປະສານງານລະຫວ່າງ ອົງການກວດກາລັດແຂວງ ກັບອົງການກວດສອບ ປະຈໍາພາກເໜືອ 2 ແລະ ລະບຽບການວ່າດ້ວຍການເກັບຮັກສາເອກະສານກ່ຽວກັບການກວດກາລັດ ເລກທີ 138/ອກຫລ, ລົງວັນທີ 09 ເມສາ 2024.