ກອງປະຊຸມສະຫຼຸບວຽກງານກວດກາທົ່ວແຂວງສາລະວັນ ປະຈຳປີ 2024 ແລະ ທິດທາງແຜນການປີ 2025 ໄດ້ຈັດຂຶ້ນໃນຕອນເຊົ້າ ຂອງວັນທີ 14 ພຶດສະພາ 2025 ນີ້ ຢູ່ທີ່ສະໂມສອນແຂວງ ພາຍໃຕ້ການເປັນປະທານຂອງສະຫາຍ ສົມສັກ ທົງຄຳຫານ ກຳມະການພັກແຂວງ, ປະທານຄະນະກວດກາພັກ, ປະທານອົງການກວດກາລັດ, ຫົວໜ້າອົງການຕ້ານການສໍ້ລາດບັງຫຼວງແຂວງສາລະວັນ, ໂດຍການເປັນກຽດເຂົ້າຮ່ວມຂອງ ສະຫາຍ ດາວວົງ ພອນແກ້ວ ກຳມະການສູນກາງພັກ ເລຂາພັກແຂວງ ເຈົ້າແຂວງແຂວງສາລະວັນ, ມີກຳມະການພັກແຂວງ, ເລຂາຄະນະພັກຮາກຖານ, ຫົວໜ້າ-ຮອງຫົວໜ້າພະແນກການ, ປະທານກວດກາພັກບັນດາເມືອງ, ຜູ້ກວດກາໜ່ວຍພັກບັນດາພະແນກການ, ລັດວິສາຫະກິດອ້ອມຂ້າງແຂວງ ແລະ ພະນັກງານກວດກາເຂົ້າຮ່ວມ.ໃນກອງປະຊຸມ ສະຫາຍ ສົມສັກ ທົງຄຳຫານ ໄດ້ກ່າວວ່າ: ກອງປະຊຸມຄັ້ງນີ້ ຈະພ້ອມກັນສະຫຼຸບຕີລາຄາຄືນຜົນໄດ້ຮັບທັງໝົດ, ນັບທັງດ້ານດີ ຜົນສໍາເລັດ, ດ້ານອ່ອນ-ຂໍ້ຄົງຄ້າງ ໃນການເຄື່ອນໄຫວວຽກງານຕິດຕາມ, ກວດກາພັກ, ກວດກາລັດ, ສະກັດກັ້ນ-ຕ້ານການສໍ້ລາດບັງຫຼວງ ແລະ ຄົ້ນຄວ້າພິຈາລະນາຄໍາຮ້ອງ-ຄໍາສະເໜີ ປີ 2024, ເຊິ່ງຈະໄດ້ຄົ້ນຄວ້າປຶກສາຫາລືບັນຫາຕ່າງໆໃຫ້ເລິກເຊິ່ງ ເພື່ອເສີມຂະຫຍາຍດ້ານດີທີ່ຕັ້ງໜ້າ ແລະ ປັບປຸງແກ້ໄຂຂໍ້ຄົງຄ້າງ. ຈາກນັ້ນ, ສະຫາຍ ແສງທອງ ສີອ່ອນສາ ໄດ້ສະຫຼຸບຕີລາຄາການເຄື່ອນໄຫວວຽກງານກວດກາ ປະຈຳປີ 2024 ແລະ ທິດທາງແຜນການປີ 2025, ເຊິ່ງໃນ 1 ປີຜ່ານມາ ໄດ້ຕິດຕາມ, ກວດກາ ການຈັດຕັ້ງປະຕິບັດຄໍາສັ່ງ ຂອງກົມການເມືອງສູນກາງພັກ ເລກທີ 01/ກມສພ ແລະ ຄໍາແນະນໍາ ຂອງຄະນະຈັດຕັ້ງສູນກາງພັກ ເລກທີ 291/ຄຈສພ ໃນການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ດໍາເນີນການກວດກາລາຍຮັບ-ລາຍຈ່າຍ ແລະ ການຄຸ້ມຄອງ-ນໍາໃຊ້ເງິນກອງທຶນທາງ ແຕ່ປີ 2020-2023. ໃນນັ້ນ, ງົບປະມານກອງທຶນທາງບ້ວງ 80% ທີ່ກະຊວງໂຍທາທິການ-ຂົນສົ່ງ ເປັນຜູ້ຄຸ້ມຄອງ-ນໍາໃຊ້ ຈໍານວນ 05 ໂຄງການ (14 ສັນຍາ), ມູນຄ່າຕາມສັນຍາ 81.14 ຕື້ກີບ, ມູນຄ່າປະຕິບັດໄດ້ 71.51 ຕື້ກີບ ແລະ ງົບປະມານກອງທຶນທາງບ້ວງ 20% ທີ່ມອບໃຫ້ແຂວງຄຸ້ມຄອງ-ນໍາໃຊ້ ມີທັງໝົດ 95 ໂຄງການ, ມູນຄ່າຕາມສັນຍາ 51.87 ຕື້ກີບ, ມູນຄ່າປະຕິບັດໄດ້ 51.87 ຕື້ກີບ, ຜ່ານການກວດກາພົບເຫັນຫຼາຍສັນຍາ ບໍ່ທັນໄດ້ຢັ້ງຢືນຄວາມຖືກຕ້ອງຈາກທະບຽນສານ ແລະ ຍັງບໍ່ທັນໄດ້ຈົດທະບຽນຊັບສິນ; ໄດ້ດໍາເນີນກວດກາການນໍາເຂົ້ານໍ້າມັນເຊື້ອໄຟ ຜ່ານດ່ານສາກົນຢູ່ແຂວງ ສາລະວັນ ແຕ່ປີ 2019-2023 ຈຳນວນ 05 ບໍລິສັດ ເຫັນວ່າມີການນໍາເຂົ້ານໍ້າມັນເຊື່ອໄຟຖືກຕ້ອງຕາມລະບຽບການ. ພ້ອມນັ້ນ, ກອງປະຊຸມຍັງໄດ້ຮັບຟັງການເຜີຍແຜ່ບັນດາເອກສານທີ່ສຳຄັນທີ່ຕິດພັນກັບວຽກງານກວດກາ, ພ້ອມທັງຮ່ວມກັນຄົ້ນຄວ້າປະກອບຄຳເຫັນໃສ່ບົດສະຫຼຸບ ເພື່ອເຮັດໃຫ້ມີເນື້ອໃນຄົບຖ້ວນສົມບູນຂຶ້ນຕື່ມ.