ໃນຕົ້ນເດືອນ ເມສາ 2025 ຄະນະກວດກາພັກ, ອົງການກວດກາລັດແຂວງ ອຸດົມໄຊ ໄດ້ຈັດກອງປະຊຸມ ສະຫຼຸບຕີລາຄາວຽກງານກວດກາທົ່ວແຂວງ ປະຈຳປີ 2024 ຢູ່ຫ້ອງປະຊຸມ ຫ້ອງວ່າການແຂວງ ໂດຍໃຫ້ກຽດເປັນປະທານຂອງ ສະຫາຍ ວາລີ ຈືນໍເຢັງ ກຳມະການພັກແຂວງ, ປະທານຄະນະກວດກາພັກແຂວງ, ປະທານອົງການກວດກາລັດແຂວງ ແລະ ຫົວໜ້າອົງການຕ້ານການສໍ້ລາດບັງຫຼວງແຂວງ, ມີບັນດາສະຫາຍ ກຳມະການພັກແຂວງ, ຜູ້ຕາງໜ້າທີ່ເຮັດວຽກງານກວດກາຈາກພະແນກການ, ອົງການ, ກົມກອງ ແລະ ຄະນະກວດກາພັກເມືອງ 7 ເມືອງເຂົ້າຮ່ວມ.

ກອງປະຊຸມຄັ້ງນີ້ໄດ້ພ້ອມກັນສະຫຼຸບຕີລາຄາການຈັດຕັ້ງປະຕິບັດ ມະຕິກອງປະຊຸມໃຫຍ່ຂອງຄະນະບໍລິຫານງານສູນກາງພັກ ຄັ້ງທີ XI ແລະ ຜັນຂະຫຍາຍເນື້ອໃນ ກອງປະຊຸມວຽກງານກວດກາທົ່ວປະເທດປະຈຳປີ 2024 ເຂົ້າເຂົ້າໃນການເຄື່ອນໄຫວວຽກງານກວດກາຕົວຈິງ ໂດຍສະເພາະການເຄື່ອນໄຫວວຽກງານກວດກາ ຕາມທິດທາງແຜນການປີ 2025. ຄຽງຄູ່ກັນນີ້, ຍັງໄດ້ເຜີຍແຜ່ ແລະ ເຊື່ອມຊຶມເອກະສານສຳຄັນຈຳນວນໜຶ່ງ ເປັນຕົ້ນ: ບົດບັນທຶກການປະສານງານ ລະຫວ່າງ ອົງການກວດກາແຫ່ງລັດ ກັບ ອົງການກວດສອບແຫ່ງລັດ; ບົດບັນທຶກ ການປະສານງານລະຫວ່າງ ອົງການກວດກາລັດແຂວງ ກັບ ອົງການກວດສອບປະຈຳພາກເໜືອ 2; ລະບຽບການ ວ່າດ້ວຍການຮັກສາເອກະສານ ການກວດກາລັດ ເລກທີ 138/ອກຫລ, ລົງວັນທີ 9 ເມສາ 2024; ບົດບັນທຶກ ການປະສານງານລະຫວ່າງ ອົງການກວດກາແຫ່ງລັດ ກັບ ກະຊວງປ້ອງກັນຄວາມສະຫງົບ, ກະຊວງຍຸຕິທຳ ແລະ ອົງການໄອຍະການປະຊາຊົນສູງສຸດ ໃນການດຳເນີນຄະດີການສໍ້ລາດບັງຫຼວງ ສະບັບລົງວັນທີ 29 ມັງກອນ 2024 ແລະ ບົດບັນທຶກ ການປະສານງານລະຫວ່າງ ສານປະຊາຊົນສູງສຸດ ກັບ ອົງການກວດກາແຫ່ງລັດ ກ່ຽວກັບ ການດຳເນີນຄະດີ.