ໃນຕອນເຊົ້າວັນທີ 29 ເມສາ 2025 ອົງການກວດຫາແຫ່ງລັດ ຮ່ວມກັບອົງການ UNODC ຈັດກອງປະຊຸມສຳມະນາກ່ຽວກັບແຜນຍຸດທະສາດຕ້ານການສໍ້ລາດບັງຫຼວງ ປີ 2025-2035 ໃຫ້ກຽດເຂົ້າຮ່ວມໂດຍ ທ່ານ ປອ ດາວບົວລະພາ ບາວົງເພັດ ຮອງປະທານອົງການກວດກາແຫ່ງລັດ ແລະ ທ່ານ ສາງ ໂຮ ວາງ (Sung Ho HWANG) ຫົວໜ້າຫ້ອງການ UNODC ປະຈຳ ສປປ ລາວ, ພ້ອມດ້ວຍຜູ້ເຂົ້າຮ່ວມຈາກ ກະຊວງ-ອົງການ ແລະ ອົງການກວດກາແຫ່ງລັດ.

ໂອກາດນີ້ ທ່ານ ປອ ດາວບົວລະພາ ບາວົງເພັດ ໄດ້ໃຫ້ກຽດມີຄຳເຫັນກ່າວເປີດກອງປະຊຸມ ເຊິ່ງທ່ານໄດ້ສະແດງຄວາມຕ້ອນຮັບ ແລະ ຂອບໃຈ ຕໍ່ຄະນະຊ່ຽວຊານຈາກອົງການ UNODC, ຫ້ອງການ ອົງການ UNODC ປະຈຳ ສປປ ລາວ ແລະ ພາກພື້ນອາຊີປາຊີຟິກທີ່ໃຫ້ການສະໜັບສະໜູນທຶນຮອນສຳລັບການຈັດກອງປະຊຸມໃນຄັ້ງນີ້. ພ້ອມນີ້, ທ່ານຍັງໄດ້ກ່າວຕື່ມອີກວ່າ ກອງປະຊຸມສຳມະນາຄັ້ງນີ້ ຜູ້ເຂົ້າຮ່ວມຈະໄດ້ຮັບຟັງ ການບັນຍາຍຂອງນັກວິທະຍາກອນ ຈາກ ອົງການ UNODC ແລະ ອົງການກວດກາແຫ່ງລັດ ກ່ຽວກັບຮ່າງແຜນຍຸດທະສາດຕ້ານການສໍ້ລາດບັງຫຼວງ ແລະ ຮ່າງແຜນປະຕິບັດງານຕ້ານການສໍ້ລາດບັງຫຼວງ ແຕ່ປີ 2025-2035 ຄໍາແນະນຳກ່ຽວກັບແຜນການຍຸດທະສາດ ເຊິ່ງຈະໄດ້ລົງເລິກການປຶກສາຫາລືທີ່ກ່ຽວຂ້ອງກັບແຕ່ລະຂົງເຂດພາກລັດ ແລະ ເອກະຊົນ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ ແລະ ອື່ນໆໃນການສະກັດກັ້ນ ແລະ ຕ້ານການສໍ້ລາດບັງຫຼວງໃນຕໍ່ໜ້າໃຫ້ກວ້າງຂວາງ ແລະ ມີປະສິດຕິຜົນ.