ໃນຕອນເຊົ້າຂອງວັນທີ 27 ກຸມພາ 2025 ສະຫະພັນແມ່ຍິງຮາກຖານຄະນະກວດກາພັກແຂວງເຊກອງ ໄດ້ເປີດກອງປະຊຸມໃຫຍ່ຄັ້ງທີ XI ຂຶ້ນ, ໃຫ້ກຽດເປັນປະທານຮ່ວມໂດຍສະຫາຍນາງ ສີສະຫງ່າ ແກ້ວດວງດີ ກຳມະການປະຈຳພັກແຂວງ, ວ່າການປະທານຄະນະກວດກາພັກແຂວງ, ສະຫາຍ ນາງ ມະໂນລາ ສຸດທິຈັກ ເລຂາໜ່ວຍພັກຮາກຖານ, ວ່າການປະທານຄະນະບໍລິຫານງານສະຫະພັນແມ່ຍິງແຂວງ ແລະ ສະຫາຍ ນາງ ເພັດສຸພັນ ແກ້ວລັງສີ ປະທານສະຫະພັນແມ່ຍິງຮາກຖານ, ມີແຂກທີ່ຖືກເຊີນຈາກ ສະຫະພັນແມ່ຍິງຮາກຖານ, ໜ່ວຍອ້ອມຂ້າງແຂວງພ້ອມດ້ວຍສະມາຊິກແມ່ຍິງພາຍໃນຮາກຖານເຂົ້າຮ່ວມ.ໃນກອງປະຊຸມ ໄດ້ຜ່ານຮ່າງບົດລາຍງານການເມືອງ, ບົດສໍາຫຼວດການນຳພາລວມ ພ້ອມນີ້ ຜູ້ແທນກອງປະຊຸມກໍ່ໄດ້ພ້ອມກັນປະກອບຄຳເຫັນຕໍ່ສອງຮ່າງເອກະສານດັ່ງກ່າວ. ຈາກນັ້ນ ທ່ານ ນາງ ວຽງໄຊ ພົມມະຈັນ ຕາງໜ້າຂະແໜງຈັດຕັ້ງ ແລະ ກວດກາສະຫະພັນແມ່ຍິງແຂວງ ໄດ້ຜ່ານຂໍ້ຕົກລົງຂອງປະທານຄະນະບໍລິຫານງານສະຫະພັນແມ່ຍິງແຂວງ ວ່າດ້ວຍການມອບໃບຍ້ອງຍໍໃຫ້ຄະນະປະທານສະຫະພັນແມ່ຍິງຮາກຖານທີ່ມີຜົນງານດີເດັ່ນໃນການປະກອບສ່ວນຊີ້ນຳ-ນຳພາວຽກງານພາຍໃນຮາກຖານໃຫ້ 3 ສະຫາຍ ແລະ ມອບໃບຍ້ອງຍໍໃຫ້ສະມາຊິກທີ່ມີຜົນງານດີເດັ່ນໃນການປະກອບສ່ວນວຽກງານສະຫະພັນແມ່ຍິງຕິດພັນກັບວິຊາສະເພາະໄລຍະ 5 ປີ ຜ່ານມາ ( 2019-2024) 9 ສະຫາຍ, ໃບຊົມເຊີຍ 2 ສະຫາຍ ແລະ ຜ່ານຂໍ້ຕົກລົງຂອງປະທານສະຫະພັນແມ່ຍິງແຂວງ ວ່າດ້ວຍການຮັບຮອງເອົາບຸກຄະລາກອນເຂົ້າໃນໂຄງປະກອບ ແລະ ດຳເນີນການປ່ອນບັດເລືອກເອົາຄະນະຊຸດໃໝ່ເຊິ່ງມີຜູ້ອອກຮັບສະໝັກເລືອກຕັ້ງທັງໝົດ 5 ສະຫາຍ, ເລືອກເອົາ 3 ສະຫາຍ, ກອງປະຊຸມຄັ້ງປະຖົມມະລຶກໄດ້ເປັນເອກະສັນເລືອກເອົາ ສະຫາຍ ນາງ ເພັດສຸພັນ ແກ້ວລັງສີ ເປັນປະທານ, ສະຫາຍ ນາງ ລັດສະໝີ ວັນລາເບືອມ ເປັນຮອງປະທານ ແລະ ສະຫາຍ ນາງ ໝ່ອມມະນີ ບຸນປະເສີດ ເປັນຮອງປະທານພ້ອມທັງເປັນປະທານກວດກາ.

ໃນຕອນທ້າຍສະຫາຍ ນາງ ມະໂນລາ ສຸດທິຈັກ ໄດ້ໃຫ້ກຽດມີຄຳເຫັນໂອ້ລົມຕໍ່ກອງປະຊຸມ ເຊິ່ງໄດ້ສະແດງຄວາມຊົມເຊີຍ ແລະ ຍ້ອງຍໍ ຕໍ່ຄະນະຊຸດເກົ່າທີ່ສາມາດຍາດຜົນສຳເລັດມາໄດ້ໃນຫຼາຍດ້ານ ແລະ ພ້ອມມີຄຳເຫັນຊີ້ນຳໃຫ້ ຄະນະສະຫະພັນແມ່ຍິງຮາກຖານຊຸດໃໝ່ ຖືສໍາຄັນ ແລະ ເອົາໃຈໃສ່ຕໍ່ກັບວຽກງານສຶກສາອົບຮົມການເມືອງ-ແນວຄິດ ເພື່ອໃຫ້ສະມາຊິກເຊື່ອມຊຶມ, ຮັບຮູ້, ກຳແໜ້ນຕໍ່ແນວທາງຂອງພັກ-ລັດ, ປັບປຸງອົງການຈັດຕັ້ງໃຫ້ມີຄວາມເຂັ້ມແຂງ ເພື່ອຊີ້ນຳວຽກງານແມ່ຍິງຄຽງຄູ່ກັບວິຊາສະເພາະ, ເຕົ້າໂຮມຄວາມສາມັກຄີພາຍໃນໃຫ້ໜັກແໜ້ນ, ເອົາໃຈໃສ່ນໍາພາສະມາຊິກຂອງຕົນໄດ້ເຄື່ອນໄຫວດໍາເນີນຊີວິດການເມືອງ ແລະ ເສຍເງິນສະຕິພ້ອມທັງສ່ອງແສງລາຍງານເປັນປົກກະຕິ, ສືບຕໍ່ ປົກປັກຮັກສາມູນເຊື້ອຂອງແມ່ຍິງບັນດາເຜົ່າ, ເອົາໃຈໃສ່ຍົກລະດັບຄວາມຮູ້, ຄວາມສາມາດໃຫ້ມີຄວາມກ້າວໜ້າ, ສະກັດກັ້ນ ແລະ ຕ້ານປະກົດການຫຍໍ້ທໍ້ໃນສະມາຊິກແມ່ຍິງໂດຍສະເພາະຫຼີກລ້ຽງການຫຼີ້ນກິນຟຸມເຟືອຍ ແລະ ມີສະຕິໃນການໃຊ້ສື່ສັງຄົມອອນລາຍ.