ໃນຕອນເຊົ້າຂອງວັນທີ 28 ກຸມພາ 2025 ນີ້ ຄະນະບໍລິຫານງານຊາວໜຸ່ມຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດກອງປະຊຸມ ທາບທາມບຸກຄະລາກອນຮອບທີ 1 (ຮອບເປີດກວ້າງ) ໂດຍການເປັນປະທານຂອງ ສະຫາຍ ກົງໃຈ ວິລະສັກ ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມ ຄກສພ-ອກຫລ, ໃຫ້ກຽດເຂົ້າຮ່ວມໂດຍ ສະຫາຍ ສຸກຄຳເພັດ ເຮືອງບຸດສີ ກຳມະການປະຈຳພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີບັນດາສະຫາຍສະມາຊິກຊາວໜຸ່ມທົ່ວອົງການເຂົ້າຮ່ວມ.

ໃນກອງປະຊຸມ ສະຫາຍ ຈັນພອນ ໄຊຍະແສງ ຮອງເລຂາຄະນະບໍລິຫານງານຊາວໜຸ່ມ ຄກສພ-ອກຫລ ໄດ້ຜ່ານຮ່າງບົດລາຍງານການເມືອງ ຂອງຄະນະບໍລິຫານງານຊາວໜຸ່ມ ສະໄໝທີ V, ສະຫາຍ ກົງໃຈ ວິລະສັກ ຜ່ານບົດສຳຫຼວດການນຳພາລວມ ຂອງຄະນະບໍລິຫານງານຊາວໜຸ່ມ ສະໄໝທີ V. ພາຍຫຼັງທີ່ໄດ້ຮັບຟັງການຜ່ານສອງຮ່າງເອກະສານແລ້ວ ບັນດາສະຫາຍ ສະມາຊິກຊາວໜຸ່ມກໍ່ໄດ້ພ້ອມກັນ ປະກອບຄຳເຫັນໃສ່ບັນດາຮ່າງເອກະສານດັ່ງກ່າວຢ່າງກົງໄປກົງມາເພື່ອເຮັດໃຫ້ເນື້ອໃນມີຄວາມສົມບູນ ແລະ ແທດຕົວກັບຈິງ.

ຈາກນັ້ນ ສະຫາຍ ນາງ ອະລຸນາ ບຸດຕະລາດ ຮອງຫົວໜ້າ ກົມຈັດຕັ້ງ-ພະນັກງານ ໄດ້ຜ່ານມາດຖານເງື່ອນໄຂຂອງຜູ້ທີ່ມີສິດອອກຮັບສະໝັກເລືອກຕັ້ງເຂົ້າໃນຄະນະບໍລິຫານງານຊາວໜຸ່ມ ຄກສພ-ອກຫລ ຂອງຄະນະບໍລິຫານງານຊາວໜຸ່ມ ຊຸດໃໝ່ (ສະໄໝທີ VI).

ພ້ອມນີ້ ສະຫາຍ ສຸກຄຳເພັດ ເຮືອງບຸດສີ ໄດ້ໃຫ້ກຽດມີຄຳເຫັນໂອ້ລົມຕໍ່ກອງປະຊຸມເຊິ່ງສະຫາຍໄດ້ເນັ້ນໃຫ້ສະມາຊິກຊາວໜຸ່ມທຸກສະຫາຍເອົາໃຈໃສ່ຄົ້ນຄວ້າພິຈາລະນາ ເລືອກເຟັ້ນເອົາຜູ້ທີ່ມີຄວາມຮູ້, ຄວາມສາມາດ ແລະ ມີມາດຖານເງື່ອນໄຂທີ່ເໝາະສົມ, ໃຊ້ສິດປະຊາທິປະໄຕຂອງຕົນ ຄົ້ນຄວ້າຢ່າງລະອຽດທີ່ຖ້ວນ, ໃຫ້ເບິ່ງທັງຄະນະຊຸດເກົ່າ ແລະ ຜູ້ໃໝ່ທີ່ຕົນເຫັນວ່າເໝາະສົມ, ຖືເອົາຜົນປະໂຫຍດສ່ວນລວມເປັນຫຼັກຫຼີກເວັ້ນແນວຄິດມັກງ່າຍ, ແນວຄິດອັກຄະຕິ ຫຼື ການຊັກຊວນຈາກຜູ້ມາເປັນເງື່ອນໄຂໃນການເລືອກເຟັ້ນ ໃຫ້ຄົ້ນຄວ້າດ້ວຍຕົນເອງຢ່າງພາວະວິໄສ ຄົ້ນຄວ້າເອົາຜູ້ທີ່ມີຜົນງານດີເດັ່ນມີຄຸນທາດການເມືອງໜັກແໜ້ນ.

ນອກຈາກນີ້, ໃນກອງປະຊຸມຍັງໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບຄວບຄຸມການປ່ອນບັດທາບທາມ ແລະ ດຳເນີນການປ່ອນບັດທາບທາມຮອບທີ1 ຕາມຂັ້ນຕອນ.