ກອງປະຊຸມກວດກາ, ປະເມີນການຈັດຕັ້ງປະຕິບັດຂະບວນການຂໍ້ແຂ່ງຂັນ 04 ບຸກ ຂອງຄະນະບໍລິຫານງານຊາວໜຸ່ມ ຄກສພ-ອກຫລ
13/02/2025
ໃນຕອນບ່າຍຂອງວັນທີ 12 ກຸມພາ 2025 ຄະນະບໍລິຫານງານຊາວໜຸ່ມ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດກອງປະຊຸມກວດກາ, ປະເມີນການຈັດຕັ້ງປະຕິບັດຂະບວນການຂໍ້ແຂ່ງຂັນ 04 ບຸກ, ໂດຍການເປັນປະທານຮ່ວມຂອງ ສະຫາຍ ບໍລິລັກ ດວງສະຫວັນ ຮອງຫົວໜ້າກົມກວດກາ, ຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວ ແລະ ສະຫາຍ ກົງໃຈ ວິລະສັກ ເລຂາຄະນະບໍລິຫານງານຊາວໜຸ່ມ ຄກສພ-ອກຫລ, ມີຕາງໜ້າຈາກບັນດາໜ່ວຍພັກ, ອົງການຈັດຕັ້ງມະຫາຊົນ, ບັນດາໜ່ວຍຊາວໜຸ່ມ ຄກສພ-ອກຫລ ແລະ ຄະນະກວດກາປະເມີນຂະບວນການ 4 ບຸກ ຈາກສູນກາງຊາວໜຸ່ມເຂົ້າຮ່ວມ.
ໃນກອງປະຊຸມ ສະຫາຍ ກົງໃຈ ວິລະສັກ ໃຫ້ຮູ້ວ່າ ຄະນະບໍລິຫານງານຊາວໜຸ່ມ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດໃຫ້ສະມາຊິກຊາວໜຸ່ມທີ່ຂຶ້ນກັບຄວາມຮັບຜິດຊອບຂອງຕົນ ຢ່າງເປັນປົກກະຕິ. ເຊິ່ງເຮັດໃຫ້ສະມາຊິກຊາວໜຸ່ມ ມີຄວາມສາມັກຄີ, ມີຄວາມຫ້າວຫັນ, ປະຕິບັດຂໍ້ຫ້າມ, ກົດໝາຍ ແລະ ລະບຽບການຕ່າງໆຂອງລັດ ໄດ້ເປັນຢ່າງດີ ໂດຍສະເພາະກົດໝາຍ ວ່າດ້ວຍພະນັກງານ-ລັດຖະກອນ ແລະ ກົດໝາຍ ວ່າດ້ວຍຊາວໜຸ່ມປະຊາຊົນປະຕິວັດລາວ.
ສະມາຊິກຊາວ ໜຸ່ມແຕ່ລະສະຫາຍໄດ້ ເປັນເຈົ້າການເຂົ້າຮ່ວມຂະບວນການຕ່າງໆ ທີ່ອົງການຈັດຕັ້ງມະຫາຊົນຈັດຂຶ້ນຢ່າງເປັນປົກກະຕິເປັນຕົ້ນແມ່ນ: ຂະບວນການເປີດຝຶກອົບຮົມພາສາຕ່າງປະເທດ, ຂະບວນການຊາວໜຸ່ມຕະລຸມບອນ, ຂະບວນການອອກແຮງງານອະນາໄມ ເພື່ອຂໍ່ານັບຮັບຕ້ອນວັນສໍາຄັນຕ່າງໆຂອງຊາດ, ຂອງພັກ, ຂະບວນການສີລະປະ-ວັນນະຄະດີ, ກິລາ, ບໍລິຈາກເລືອດເພື່ອຊ່ວຍເຫຼືອສັງຄົມ. ພ້ອມກັນນີ້, ສະມາຊິກຊາວໜຸ່ມຕົວແບບ ໃນການສ້າງເສດຖະກິດຄອບຄົວ ກໍໄດ້ລາຍງານສະພາບຄວາມເປັນມາຂອງຄອບຄົວ ແລະ ການດຳເນີນທຸລະກິດສ່ວນຕົວທີ່ເຮັດໃຫ້ກາຍມາເປັນສະມາຊິກຊາວໜຸ່ມຕົວແບບ ໃນການສ້າງເສດຖະກິດຄອບຄົວອີກດ້ວຍ. ໃນຕອນທ້າຍຂອງກອງປະຊຸມຍັງໄດ້ມີການແລກປ່ຽນຄຳຄິດ-ຄຳເຫັນໃນການຈັດຕັ້ງປະຕິບັດຂະບວນການຂໍ້ແຂ່ງຂັນ 04 ບຸກໃນໄລຍະທີ່ຜ່ານມາເພື່ອເປັນບ່ອນອີງ, ທິດທາງໃນການເຄື່ອນໄຫວປະຕິບັດວຽກງານໃນຕໍ່ໜ້າຕື່ມອີກ.
