ພາຍຫຼັງທີ່ໄດ້ດຳເນີນມາເປັນເວລາ 2 ວັນກອງປະຊຸມວຽກງານກວດກາທົ່ວປະເທດປະຈຳປີ 2024 ກໍ່ໄດ້ປິດລົງດ້ວຍຜົນສຳເລັດຢ່າງຈົບງາມໃນຕອນບ່າຍຂອງວັນທີ 4 ກຸມພາ 2025 ເຊິ່ງໃນຕອນທ້າຍຂອງກອງປະຊຸມ ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ກໍ່ໄດ້ໃຫ້ກຽດໂອ້ລົມຕໍ່ກອງປະຊຸມພ້ອມເນັ້ນ 5 ບັນຫາ ໃຫ້ຜູ້ແທນກອງປະຊຸມເອົາໃຈໃສ່ຄື: ໜຶ່ງ: ຄະນະພັກທຸກຂັ້ນ ຕ້ອງສືບຕໍ່ນໍາພາ-ຊີ້ນໍາເອົາໃຈໃສ່ຕິດຕາມ-ກວດກາການຈັດຕັ້ງປະຕິ ບັດບັນດາຄາດໝາຍສູ້ຊົນມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມຄົບຄະນະບໍລິຫານງານສູນກາງພັກກໍ່ຄື 02 ວາລະແຫ່ງຊາດ ແລະ ມະຕິກອງປະຊຸມໃຫຍ່ຂອງອົງຄະນະພັກຂັ້ນຕົນ ໃນທ້າຍສະໄໝຂອງກອງປະຊຸມໃຫຍ່ ໃຫ້ຮັບປະກັນເນື້ອໃນຈິດໃຈທີ່ກໍານົດໄວ້ໃນມະຕິກອງປະຊຸມໃຫຍ່; ສືບຕໍ່ຈັດຕັ້ງປະຕິບັດເນື້ອໃນກອງປະຊຸມວຽກງານກວດກາທົ່ວປະເທດ ຄັ້ງທີ IV ໃຫ້ສອດຄ່ອງກັບບັນດາມະຕິ, ຄຳສັ່ງ ຂອງສູນກາງພັກ; ນໍາເອົາເນື້ອໃນກອງປະຊຸມກວດກາທົ່ວປະເທດຄັ້ງນີ້ ໄປຜັນຂະຫຍາຍເຂົ້າໃນຂະບວນການວຽກງານຕົວຈິງຢ່າງແຂງແຮງ.

ບັນດາຄະນະກວດກາກະຊວງ-ອົງການ ແລະ ແຂວງ-ນະຄອນຫຼວງວຽງຈັນ ຕ້ອງຮີບຮ້ອນປຶກສາຫາລື ແລະ ຫັນເປັນແຜນການເຄື່ອນໄຫວປະຕິບັດໃຫ້ລະອຽດຈະແຈ້ງ ໂດຍຕິດພັນກັບການແກ້ໄຂບັນຫາຕົວຈິງ ທີ່ຍັງຄົງຄ້າງຜ່ານມາ ກໍ່ຄືບັນຫາທີ່ເກີດຂຶ້ນໃນແຕ່ລະໄລຍະຂອງການເຄື່ອນໄຫວນຳພາ-ຊີ້ນຳ ໂດຍປະຕິບັດຕາມຈິດໃຈ ເຮັດຮອດໃສ ກວດກາຮອດຫັ້ນ ເຫັນການລະເມີດຢູ່ບ່ອນໃດ ກໍ່ແກ້ໄຂໃຫ້ເດັດຂາດທັນການ, ບໍ່ປະໃຫ້ຄຸມເຄືອແກ່ຍາວ; ສອງ: ສືບຕໍ່ຕິດຕາມ, ກວດກາການປະຕິບັດກົດລະບຽບຂອງພັກ ສະໄໝທີ XI ເປັນຕົ້ນ: ການປະຕິບັດຫຼັກການລວມສູນປະຊາທິປະໄຕຂອງພັກ ໃນການປຶກສາຫາລືຢ່າງມີປະຊາທິປະໄຕເລິກເຊິ່ງ, ເອກະພາບເນື້ອໃນໜ້າທີ່ການເມືອງ ແລະ ຫຼັກການ, ຮັບຮອງເປັນມະຕິດ້ວຍສຽງສ່ວນຫຼາຍ, ປະຕິບັດລະບອບປະຊຸມ, ລະບອບສ່ອງແສງລາຍງານ, ການຮ່ວມຊີວິດພັກ, ການຕໍານິຕິຊົມເຊິ່ງກັນ ແລະ ກັນ, ການກໍ່ສ້າງພັກ-ຂະຫຍາຍພັກ, ການລົງວິໄນ ແລະ ການເງິນຂອງພັກ ຢູ່ຂົງເຂດທີ່ຕົນຮັບຜິດຊອບ. ພ້ອມນັ້ນ, ຄະນະກວດກາພັກແຕ່ລະຂັ້ນ ຕ້ອງສືບຕໍ່ເອົາໃຈໃສ່ຕິດຕາມ, ກໍາສະພາບການປະຕິບັດໜ້າທີ່ຂອງພະນັກງານຂັ້ນຕົນຄຸ້ມຄອງ ເພື່ອເປັນຂໍ້ມູນຮັບໃຊ້ບັ້ນດຳເນີນຊີວິດການເມືອງທ້າຍສະໄໝ ຂອງຄະນະພັກແຕ່ລະຂັ້ນ ແລະ ເພື່ອຊ່ວຍໃຫ້ແກ່ຄະນະພັກຂັ້ນຕົນ ໃນການຄົ້ນຄວ້າ, ເລືອກເຟັ້ນດ້ານບຸກຄະລາກອນ ໃຫ້ແກ່ການດໍາເນີນກອງປະຊຸມໃຫຍ່ຂອງອົງຄະນະພັກຂັ້ນຕົນ ໃຫ້ໄດ້ບຸກຄະລາກອນທີ່ມີມາດຖານເງື່ອນໄຂຄົບຖ້ວນຕາມມະຕິຂອງກົມການເມືອງສູນກາງພັກ ສະບັບເລກທີ 030, ເດັດຂາດບໍ່ໃຫ້ບຸກຄະລາກອນທີ່ບໍ່ຄົບມາດຖານເງື່ອນໄຂ, ຜູ້ທີ່ມີການເຄື່ອນໄຫວລະເມີດລະບຽບກົດໝາຍ ເຂົ້າໃນກົງຈັກການຈັດຕັ້ງ;

ນອກຈາກນັ້ນ, ໃຫ້ເອົາໃຈໃສ່ກວດກາລົງເລິກການປະຕິບັດກົດໝາຍ, ພາລະບົດບາດ, ສິດໜ້າທີ່ ແລະ ຄວາມຮັບຜິດຊອບການເມືອງຂອງການຈັດ ຕັ້ງ, ສະມາຊິກພັກ-ພະນັກງງານ ໂດຍສະເພາະພະນັກງານຂັ້ນນໍາພາ-ຄຸ້ມຄອງຢູ່ແຕ່ລະຂັ້ນ ທີ່ມີການລະເມີດກົດລະບຽບຂອງພັກ, ລະບຽບ ແລະ ກົດໝາຍຂອງລັດ ເພື່ອແກ້ໄຂເດັດຂາດ, ທັນການ;ສາມ: ເພີ່ມທະວີການຕິດຕາມ-ກວດກາການຄຸ້ມຄອງບໍລິຫານລັດ ຕາມພາລະບົດບາດຂອງອົງການກວດກາລັດ, ໂດຍສຸມໃສ່ ຕິດຕາມ-ກວດກາ ການປະຕິບັດພາລະບົດບາດ, ສິດ ແລະ ໜ້າທີ່ຂອງແຕ່ລະຂະແໜງການ ແລະ ທ້ອງຖິ່ນ ຕິດພັນກັບການເຄົາລົບປະຕິບັດລັດຖະທໍາມະນູນບັນດາກົດໝາຍ, ດໍາລັດ, ຂໍ້ກໍານົດ ແລະ ລະບຽບການຕ່າງໆຂອງລັດ ລວມທັງຂອງຂະແໜງການ ແລະ ທ້ອງຖິ່ນ ວາງອອກ; ໂດຍສຸມໃສ່ຕິດຕາມ-ກວດກາການຄຸ້ມຄອງ-ນໍາໃຊ້ຊັບສິນຂອງລັດ ແລະ ຊັບພະຍາກອນຂອງຊາດ ເຊັ່ນ: ທີ່ດິນ, ແຮ່ທາດ, ໄມ້-ປ່າໄມ້, ການຄຸ້ມຄອງງົບປະມານ ແລະ ຄັງເງິນ, ກອງທຶນຕ່າງໆຂອງລັດ, ການປະຕິບັດນະໂຍບາຍປະຢັດຂອງລັດ ແລະ ອື່ນໆ; ພ້ອມນັ້ນ, ໃຫ້ສືບຕໍ່ເອົາໃຈໃສ່ຕິດຕາມ, ກວດກາບັນດາໂຄງການລົງທຶນຂອງລັດ ເລີ່ມແຕ່ຫົວທີ ໃຫ້ມີປະສິດ ທິພາບ ແລະ ປະສິດທິຜົນຍິ່ງຂຶ້ນກວ່າເກົ່າ ເພື່ອອັດຊ່ອງຫວ່າງທີ່ຈະນຳ ໄປເຖິງການລະເມີດ ແລະ ແກ້ໄຂຕໍ່ຜູ້ລະເມີດຕາມກົດໝາຍ. ນອກນັ້ນ, ກໍ່ໃຫ້ເປັນເຈົ້າການຕິດຕາມ, ຊຸກຍູ້ປະຕິບັດຜົນການກວດກາ, ແກ້ໄຂຈຸດອ່ອນຂໍ້ຄົງຄ້າງ, ຊ່ອງວ່າງຕ່າງໆ ໃນນິຕິກໍາ, ກົງຈັກ, ກົນໄກການບໍລິຫານລັດ; ສີ່: ສືບຕໍ່ສຸມໃສ່ການເຄື່ອນໄຫວຕີຖອຍການສວຍໃຊ້ໜ້າທີ່ ເພື່ອຫາຜົນປະໂຫຍດສ່ວນຕົວຂອງພະນັກງານ-ສະມາຊິກພັກ, ເຈົ້າໜ້າທີ່ລັດແຕ່ລະຂັ້ນ ຄຽງຄູ່ກັບການພິຈາລະນາຄໍາຮ້ອງ-ຄໍາສະເໜີ ຂອງປະຊາຊົນໃຫ້ລະອຽດ, ເລິກເຊິ່ງ, ພ້ອມທັງ ເພີ່ມທະວີການໂຄສະນາເຜີຍແຜ່ໃຫ້ສະມາຊິກພັກ-ພະນັກງານ, ທະຫານ-ຕຳຫຼວດ ແລະ ປະຊາຊົນຊັ້ນຄົນຕ່າງໆ ໃຫ້ຮັບຮູ້-ເຂົ້າໃຈ ກ່ຽວກັບໄພອັນ ຕະລາຍຂອງການສໍ້ລາດບັງຫຼວງ ທີ່ເປັນໄພຂົ່ມຂູ່ຕໍ່ສະຖຽນລະພາບຂອງການຈັດຕັ້ງ, ສົ່ງຜົນກະທົບເຖິງຄວາມເຫຼື້ອມໃສສັດທາ ແລະ ຄວາມເຊື່ອໝັ້ນຂອງມະຫາຊົນ ຕໍ່ການນຳພາຂອງພັກ, ຕໍ່ຄວາມສັກສິດຂອງການຄຸ້ມຄອງລັດ ແລະ ຄວາມໝັ້ນຄົງຂອງລະບອບການເມືອງພວກເຮົາ,

ພ້ອມທັງ ປຸກລະດົມໃຫ້ທຸກຊັ້ນຄົນເຂົ້າຮ່ວມຂະບວນການຕ້ານສະກັດກັ້ນປະກົດການຫຍໍ້ທໍ້ໃນຖັນແຖວພະນັກງານ-ສະມາຊິກພັກ ຫັນການເຄື່ອນໄຫວນໍາພາ-ຊີ້ນໍາ ແລະ ຈັດຕັ້ງປະຕິບັດວຽກງານຕິດຕາມ-ກວດກາ, ຕ້ານການສໍ້ລາດບັງຫຼວງ ເປັນເນື້ອໃນ ແລະ ຄາດໝາຍລະອຽດຈະແຈ້ງ ເພື່ອເປັນບ່ອນອີງອັນໜັກແໜ້ນໃນການປະຕິບັດ, ເປັນເນື້ອໃນທີ່ຮັດກຸມ ໃນການເຜີຍແຜ່ປຸກລະດົມຂະບວນການປະຕິບັດຕົວຈິງ; ຫ້າ: ປັບປຸງກົງຈັກການຈັດຕັ້ງ ຄະນະກວດກາແຕ່ລະຂັ້ນ ໃຫ້ໜັກແໜນ, ເຂັ້ມແຂງ ໂດຍປັບປຸງພາລະບົດບາດ, ບູລະນະກົງຈັກການຈັດຕັ້ງ, ສັບຊ້ອນ ແລະ ຍົກລະດັບບຸກຄະລາກອນ ແຕ່ລະຕໍາແໜ່ງງານໃຫ້ຈະແຈ້ງ ຕາມຄໍາແນະນໍາຂອງຄະນະກວດກາສູນກາງພັກ ສະບັບເລກທີ 379 ແລະ ກົດໝາຍວ່າດ້ວຍການກວດກາລັດ; ສົມທົບການກໍ່ສ້າງ-ຝຶກອົບຮົມຕາມຫຼັກສູດ ແລະ ການຈັດຕັ້ງສໍາມະນາຖອດບົດຮຽນຈາກພຶດຕິກໍາຕົວຈິງ, ພ້ອມນັ້ນ ຕ້ອງເອົາໃຈໃສ່ສຶກສາອົບຮົມການເມືອງ, ນຳພາແນວຄິດ ຕິດພັນກັບການຄຸ້ມຄອງການເຄື່ອນໄຫວປະຕິບັດໜ້າທີ່ຂອງພະນັກງານ ເພື່ອຮັບປະກັນຄວາມໂປ່ງໃສໃນການເຄື່ອນໄຫວສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນຖັນແຖວພະນັກງານກວດກາ ເມື່ອມີບັນຫາປະກົດການຫຍໍ້ທໍ້ເກີດຂຶ້ນໃນຂອບເຂດຄວາມຮັບຜິດຊອບຂອງຕົນ ຕ້ອງເປັນເຈົ້າການກວດກາແກ້ໄຂຢ່າງທັນການ ແລະ ຂາດຕົວ, ບໍ່ລໍຖ້າ ຫຼື ເອື່ອຍອີງຂັ້ນເທິງອີກ. ພວກເຮົາຕ້ອງຮັບປະກັນວ່າ ພະນັກງານກດວກາ, ເຈົ້າໜ້າທີ່ຕ້ານການສໍ້ລາດບັງຫຼວງ ຕ້ອງປະຕິບັດກົດໝາຍ ເຂັ້ມງວດກວ່າພາກສ່ວນອື່ນ, ຖ້າມີການລະເມີດ ກໍ່ອາດມີການລົງໂທດໜັກກວ່າພາກສ່ວນອື່ນ. ພ້ອມນັ້ນ, ກໍ່ໃຫ້ສືບຕໍ່ປະຕິບັດເຂັ້ມງວດຕາມເນື້ອໃນຈິດໃຈຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 169. ຄະນະພັກ, ອົງການປົກຄອງ ຕ້ອງໄດ້ສ້າງເງື່ອນໄຂດ້ານຕ່າງໆໃຫ້ຄະນະກວດກາຂັ້ນຕົນ ສາມາດເຄື່ອນໄຫວປະຕິບັດພາລະບົດບາດຂອງຕົນ ຢ່າງມີປະສິດທິຜົນ; ຄະນະກວດກາແຕ່ລະຂັ້ນກໍ່ຕ້ອງເປັນເຈົ້າການສ້າງແຜນການເຄື່ອນໄຫວ ແລະ ສະເໜີຂັ້ນເທິງພິຈາລະນາແກ້ໄຂທັນເວລາ.