15/07/2024
![ກອງປະຊຸມກອງເລຂາການຈັດຕັ້ງພາຄີຕ້ານການສໍ້ລາດບັງຫຼວງອາຊຽນ ຄັ້ງທີ 20 (ອາຊຽນ-ແພັກ)](/sia/backend/web/images/download/Content_2024071602070208.jpg)
ໃນລະຫວ່າງວັນທີ 9-10 ກໍລະກົດ ປີ 2024, ທີ່ ໂຮງແຮມອ່າງທອງ ນະຄອນຫຼວງພະບາງ ສປປ ລາວ ໄດ້ຈັດ ກອງປະຊຸມກອງເລຂາການຈັດຕັ້ງພາຄີຕ້ານການສໍ້ລາດບັງຫຼວງອາຊຽນ ຄັ້ງທີ 20 ຂຶ້ນ, ໂດຍການເປັນປະທານຂອງທ່ານ ວິໄລວັນ ບຸດດາຄຳ ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ໃຫ້ກຽດເຂົ້າຮ່ວມກ່າວຕ້ອນຮັບຄະນະຜູ້ແທນໂດຍ ທ່ານ ຄຳຫຼ້າ ລຽນປະດິດ ປະທານອົງການກວດກາລັດ ແຂວງຫຼວງພະບາງ, ມີບັນດາຄະນະຜູ້ແທນຕາງໜ້າຈາກອົງການກວດກາ ແລະ ຕ້ານການສໍ້ລາດບັງຫຼວງ 10 ປະເທດອາຊຽນ ຫຼື ອາຊຽນ-ແພັກເຂົ້າຮ່ວມ.
ເພື່ອຈັດຕັ້ງຜັນຂະຫຍາຍບົດບັນທຶກການຮ່ວມມື ແລະ ຂໍ້ກໍານົດ ຂອງອົງການຕ້ານການສໍ້ລາດບັງຫຼວງ ບັນດາປະເທດອາຊຽນ, ກໍຄືການຈັດຕັ້ງຜັນຂະຫຍາຍກອງປະຊຸມໃຫຍ່ປະຈຳປີ ຂອງອາຊຽນແພັກ ຄັ້ງທີ 19 ທີ່ໄດ້ຈັດຂຶ້ນໃນທ້າຍເດືອນພະຈິກ ປີ 2023 ຜ່ານມາທີ່ ສປປ ລາວ. ໂດຍມີຫົວຂໍ້ຍົກສູງຂີດຄວາມສາມາດຂອງອົງການ ແລະ ການຮ່ວມມືໃນການຕ້ານການສໍ້ລາດບັງຫຼວງ ລະຫວ່າງອາຊຽນ-ແພັກ ເພື່ອປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍືນຍົງໃນປີ 2030. ກອງປະຊຸມຄັ້ງນີ້ແມ່ນໄດ້ພ້ອມກັນຄົ້ນຄວ້າ, ປະກອບຄຳເຫັນ ຕໍ່ກັບບົດບັນທຶກກອງເລຂາການຈັດຕັ້ງພາຄີຕ້ານການສໍ້ລາດບັງຫຼວງ (ອາຊຽນ-ແພັກ) ຄັ້ງທີ 19 ພາຍໃຕ້ການເປັນປະທານ ຂອງອົງການຕ້ານການສໍ້ລາດບັງຫຼວງ ແຫ່ງຣາຊະອານາຈັກກຳປູເຈຍ; ຮັບຟັງການລາຍງານຫຍໍ້ຄວາມຄືບໜ້າກ່ຽວກັບການເຄື່ອນໄຫວໃນນາມອົງການອາຊຽນ-ແພັກ ພາຍໃຕ້ການເປັນປະທານຂອງອົງການກວດກາແຫ່ງລັດ ແຫ່ງສປປ ລາວ; ໄດ້ຄົ້ນຄວ້າ, ປະກອບຄຳເຫັນຕໍ່ຮ່າງເອກະສານກ່ຽວກັບການສະເຫຼີມສະຫຼອງວັນສ້າງຕັ້ງອາຊຽນ-ແພັກຄົບຮອບ 20 ປີ ທີ່ນຳສະເໜີໂດຍອົງການຕ້ານການສໍ້ລາດບັງຫຼວງປະເທດຟິລິບປີນ; ໄດ້ມີການສົນທະນາເພີ່ມເຕີມບາງເນື້ອໃນຂອງປຶ້ມເອເລັກໂຕນິກ E-Booklet ຂອງອົງການອາຊຽນ-ແພັກ ທີ່ໄດ້ຮັບຮອງເອົາໃນກອງປະຊຸມປະຈຳປີ ອາຊຽນ-ແພັກ ຄັ້ງທີ 19; ໃນກອງປະຊຸມຍັງໄດ້ປຶກສາຫາລື, ສັງເກດຄືນ ກ່ຽວກັບການປະຕິບັດແຜນດຳເນີນງານ ປີ 2023-2025 ແລະ ປັບປຸງຄືນບາງເນື້ອໃນທີ່ເຫັນວ່າມີຄວາມຈຳເປັນ ເພື່ອສະເໜີໃຫ້ກອງປະຊຸມປະຈຳປີສືບຕໍ່ພິຈາລະນາຕໍ່ໄປ, ພ້ອມທັງໄດ້ຮັບຟັງການລາຍງານການກະກຽມການສຳມະນາປະຈຳປີ 2024 ສໍາລັບອາຊຽນ-ແພັກ ແລະ ການລາຍງານຫຍໍ້ກ່ຽວກັບການກະກຽມເປັນເຈົ້າພາບຈັດກອງປະຊຸມປະຈໍາປີອາຊຽນ-ແພັກຄັ້ງທີ 20 ຈາກຄະນະກຳມະການ ລົບລ້າງການສໍ້ລາດບັງຫຼວງ ຂອງອິນໂດເນເຊຍ.
ນອກຈາກນີ້, ກອງປະຊຸມຍັງໄດ້ປຶກສາຫາລືກ່ຽວກັບບັນຫາອື່ນໆທີ່ຍັງມີຄວາມສົນໃຈ ໂດຍສະເພາະແມ່ນ ກ່ຽວກັບການຍົກສູງຂີດຄວາມສາມາດຂອງການຕ້ານການສໍ້ລາດບັງຫຼວງ ເພື່ອເປັນພື້ນຖານໃຫ້ແກ່ການຮ່ວມມື ແລະ ການເຄື່ອນໄຫວໃນຕໍ່ໜ້າຂອງອາຊຽນ-ແພັກ, ສ້າງຄວາມເປັນເອກະພາບ ການຮ່ວມມືສາມັກຄີ, ຊ່ວຍເຫຼືອ, ສະໜັບສະໜູນເຊິ່ງກັນ ແລະ ກັນ, ຮ່ວມກັນພັດທະນາວຽກງານຕ້ານການສໍ້ລາດບັງຫຼວງໃນຂົງເຂດອາຊຽນໃຫ້ເຂັ້ມແຂງ ສາມາດບັນລຸເປົ້າໝາຍໃນການພັດທະນາແບບຍືນຍົງໃນປີ 2030 ແລະ ເພື່ອເປັນບ່ອນອີງພື້ນຖານໃຫ້ແກ່ກອງປະຊຸມກອງເລຂາອາຊຽນ-ແພັກໃນຄັ້ງນີ້ ໄດ້ສືບຕໍ່ຄົ້ນຄວ້າ, ປຶກສາຫາລື, ກຳນົດບາງເນື້ອໃນຈິດໃຈ ເພື່ອໃຫ້ກອງປະຊຸມປະຈຳປີພິຈາລະນາ ການເຄື່ອນໄຫວວຽກງານຂອງອາຊຽນ-ແພັກໃນຕໍ່ໜ້າຢ່າງມີປະສິດທິຜົນ.