ໃນຕອນເຊົ້າ ວັນທີ 27 ມິຖຸນາ 2024 ນີ້, ໜ່ວຍສະຫະພັນແມ່ຍິງ ກົມຕ້ານ ແລະ ສອບສວນການສໍ້ລາດບັງຫຼວງ ຄະນະກວດກາສູນກາງພັກ ແລະ ອົງການກວດກາແຫ່ງລັດ, ໄດ້ເປີດກອງປະຊຸມໃຫຍ່ ຄັ້ງທີ I ຂຶ້ນ, ຢູ່ທີ່ສະໂມສອນຄະນະກວດກາສູນກາງພັກ, ໂດຍການເປັນປະທານຂອງທ່ານ ນາງ ໄມຄໍາ ຄໍາເພັງໄຊ ຫົວໜ້າພະແນກ, ຫົວໜ້າໜ່ວຍສະຫະພັນແມ່ຍິງກົມຕ້ານ ແລະ ສອບສວນການສໍ້ລາດບັງຫຼວງ, ໃຫ້ກຽດເຂົ້າຮ່ວມໂດຍທ່ານ ນາງ ບຸນອ້ອມ ອຸ່ນມະໂນ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ, ທ່ານ ຊ້າງແກ້ວ ນັນທະວົງ ຮອງຫົວໜ້າກົມຕ້ານ ແລະ ສອບສວນການສໍ້ລາດບັງຫຼວງ, ມີຮອງປະທານສະຫະພັນແມ່ຍິງ, ບັນດາທ່ານຜູ້ຕາງໜ້າຄະນະໜ່ວຍສະຫະພັນແມ່ຍິງ ຫ້ອງການ, ບັນດາກົມ ຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ, ພ້ອມດ້ວຍສະມາຊິກສະຫະພັນແມ່ຍິງພາຍໃນກົມເຂົ້າຮ່ວມ.

ກອງປະຊຸມໃນຄັ້ງນີ້ ຄະນະໜ່ວຍໄດ້ຜ່ານຮ່າງລາຍງານການເມືອງ ໃນໄລຍະ 5 ປີ 2020-2024 ຂອງໜ່ວຍສະຫະພັນແມ່ຍິງກົມຕ້ານ ແລະ ສອບສວນການສໍ້ລາດບັງຫຼວງ; ແຜນການໃນຕໍ່ໜ້າ ແລະ ຜ່ານຮ່າງບົດສໍາຫຼວດນໍາພາລວມຂອງຄະນະໜ່ວຍແມ່ຍິງໃນໄລຍະ 5 ປີ ຜ່ານມາ, ສະແດງມີຜົນສໍາເລັດໃນຫຼາຍດ້ານ ເປັນຕົ້ນ: ຄະນະໜ່ວຍໄດ້ນໍາພາ-ຊີ້ນໍາສະມາຊິກພາຍໃນໜ່ວຍເຂົ້າຮ່ວມຂະບວນການເຄື່ອນໄຫວຂອງສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ; ຕິດຕາມ, ຊຸກຍູ້ເຂົ້າຮ່ວມການຄົ້ນຄວ້າເຊື່ອມຊຶມເອກະສານສໍາຄັນ, ມູນເຊື້ອຂອງພັກ, ຂອງຊາດ ແລະ ປະຕິບັດວຽກງານວິຊາສະເພາະຕິດພັນກັບການປະຕິບັດວຽກງານ 3 ດີ ແລະ ຂໍ້ແຂ່ງຂັນຮັກຊາດ-ພັດທະນາ ຢ່າງເປັນຂະບວນຟົດຟື້ນ. ຈາກນັ້ນ, ກອງປະຊຸມໄດ້ດໍາເນີນການປ່ອນບັດເລືອກຕັ້ງເອົາຄະນະໜ່ວຍຊຸດໃໝ່ຕາມກົດລະບຽບຂອງແມຍິງລາວ, ເຊິ່ງກອງປະຊຸມຄັ້ງນີ້ ໄດ້ມີຜູ້ລົງສະໝັກຮັບເລືອກຕັ້ງ 5 ທ່ານ, ເລືອກເອົາ 4 ທ່ານ, ກອງປະຊຸມຄັ້ງປະຖົມມະລືກໄດ້ເປັນເອກະສັນກັນເລືອກເອົາ ທ່ານ ນາງ ໄມຄໍາ ຄໍາເພັງໄຊ ເປັນຫົວໜ້າໜ່ວຍສະຫະພັນແມ່ຍິງ, ທ່ານ ນາງ ໄມສຸກ ແພງມີໄຊ ເປັນຮອງຫົວໜ້າໜ່ວຍ ຮັບຜິດຊອບວຽກງານກວດກາ, ທ່ານ ນາງ ປັນຍາ ແສງອາລຸນ ເປັນຮອງຫົວໜ້າໜ່ວຍ ຮັບຜິດຊອບວຽກງານ 3 ດີ ແລະ ທ່ານ ນາງ ດໍາດວນ ທໍາມະວົງ ເປັນຄະນະໜ່ວຍ ຊ່ວຍວຽກຄະນະ.

ໃນຕອນທ້າຍຂອງກອງປະຊຸມ, ທ່ານ ຊ້າງແກ້ວ ນັນທະວົງ ຍັງໄດ້ມີຄໍາເຫັນໂອ້ລົມຕໍ່ກອງປະຊຸມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ໜ່ວຍແມ່ຍິງກົມຕ້ານ ແລະ ສອບສວນການສໍ້ລາດບັງຫຼວງ ທີ່ປະຕິບັດໜ້າທີ່ວຽກງານມີຜົນສໍາເລັດໃນຫຼາຍດ້ານ ພ້ອມທັງໄດ້ເນັ້ນໃຫ້ຄະນະໜ່ວຍແມ່ຍິງຊຸດໃໝ່ ຕະຫຼອດຮອດສະມາຊິກແມ່ຍິງພາຍໃນກົມຕ້ອງກໍາແໜ້ນບັນດາແນວທາງນະໂຍບາຍຂອງພັກ, ນິຕິກໍາຕ່າງໆທີ່ກ່ຽວຂ້ອງກັບວຽກງານກວດກາ, ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກສະຫະພັນແມ່ຍິງຂອງກົມຢ່າງເປັນປົກກະຕິຕໍ່ເນື່ອງ, ເພີ່ມທະວີການຊອກຮູ້ຮໍ່າຮຽນ ສ້າງຕົນເອງໃຫ້ເປັນພະນັກງານທີ່ດີເດັ່ນຂອງກົມ ກໍຄືອົງການ, ເອົາໃຈໃສ່ຮ່ວມຊີວິດໜ່ວຍແມ່ຍິງເປັນປົກກະຕິ, ອອກແຮງປຸກລະດົມຈັດຕັ້ງປະຕິບັດບັນດາຂໍ້ແຂງຂັນ 3 ດີ, ພ້ອມທັງປັບປຸງແບບແຜນວິທີນໍາພາ ແລະ ວິທີເຮັດວຽກ ຂອງໜ່ວຍສະຫະພັນແມ່ຍິງ ຕິດພັນກັບວຽກງານກໍ່ສ້າງພັກ-ພະນັກງານຂອງກົມໃຫ້ມີຄວາມເຂັ້ມແຂງໜັກແໜ້ນ.