ໃນພິທີຄັ້ງນີ້; ສະຫາຍ ຄຳຈິນດາ ໄຊຍະບູລີ ໄດ້ຂຶ້ນຜ່ານຮ່າງບົດສະຫຼຸບປະເມີນຜົນການປະຕິບັດຂໍ້ແຂ່ງຂັນ 4 ບຸກ ຂອງໜ່ວຍຮາກຖານຊາວໜຸ່ມ ຄະນະກວດກາພັກ, ອົງການກວດກາລັດແຂວງ ຄັ້ງທີ III ໄລຍະ 3 ປີ (2021-2023) ແລະ ວາງທິດທາງແຜນການ ປະຈຳປີ 2024 ຂອງໜ່ວຍຮາກຖານຊາວໜຸ່ມຄະນະກວດກາແຂວງ ເຊິ່ງໄລຍະຜ່ານມາຄະນະໜ່ວຍຮາກຖານຊາວໜຸ່ມ ແມ່ນໄດ້ສຸມໃສ່ການຈັດຕັ້ງປະຕິບັດບັນດາເນື້ອໃນຂໍ້ແຂ່ງຂັນ 4 ບຸກຂອງຊາວ ໜຸ່ມປະຊາຊົນປະຕິວັດລາວ, ໂດຍໄດ້ສ້າງແຜນການຈັດຕັ້ງປະຕິບັດເປັນແຕ່ລະໄລຍະ, ມີການຕິດຕາມ, ກວດກາປະເມີນຜົນເປັນປົກກະຕິ, ຜ່ານການຈັດຕັ້ງປະຕິບັດເຫັນໄດ້ວ່າສະມາຊິກຊາວໜຸ່ມທຸກສະຫາຍໄດ້ຖືເອົາຂໍ້ແຂ່ງຂັນ 4 ບຸກຕິດພັນກັບການຈັດຕັ້ງປະຕິບັດວຽກງານວິຊາສະເພາະ ແລະ ການເຄື່ອນໄຫວວຽກງານຮອບດ້ານຂອງຕົນໄດ້ມີຜົນສໍາເລັດເປັນຢ່າງດີ. ຜ່ານການປະເມີນສາມາດຕີລາຄາການຈັດຕັ້ງປະຕິບັດຂໍ້ແຂ່ງຂັນ 4 ບຸກໄດ້ດັ່ງນີ້: ບຸກທາງດ້ານການ ເມືອງ-ແນວຄິດປະຕິບັດໄດ້ 90,60%, ບຸກທາງດ້ານການຈັດຕັ້ງ ປະຕິບັດໄດ້ 90,80%, ບຸກທາງດ້ານຝຶກຝົນຫຼໍ່ຫຼອມ-ຮ່ຳຮຽນ ປະຕິບັດໄດ້ 90,50%, ບຸກທາງດ້ານວິຊາຊີບ-ສ້າງວຽກເຮັດງານທຳ ປະຕິບັດໄດ້ 90,80%, ຈາກນັ້້ນໄດ້ມີການຂຶ້ນຜ່ານ ລາຍຊື່ສະມາຊິກຊາວໜຸ່ມຕົວແບບ ໃນການສ້າງອາຊີບຫາລາຍໄດ້ເຂົ້າຄອບຄົວ ແລະ ຈຸຊາວໜຸ່ມຕົວແບບທີ່ມີຜົນງານດີເດັ່ນໃນການຈັດຕັ້ງປະຕິບັດວຽກງານວິຊາສະເພາະ. ພ້ອມນີ້ ສະຫາຍ ແຜນວັນທອງ ຈະເລີນເພັດ ຍັງໄດ້ໃຫ້ກຽດຂຶ້ນ ມອບໃບຢັ້ງຢືນ 4 ບຸກ, ທຸງໄຊນຳໜ້າ ຂັ້ນແຂວງໃຫ້ໜ່ວຍຊາວໜຸ່ມ ແລະ ມອບໃບຍ້ອງຍໍຂັ້ນສູນກາງຊາວ

ໜຸ່ມ ປປລ ໃຫ້ສະມາຊິກຊາວໜຸ່ມທັງໝົດ 19 ສະຫາຍ, ຍິງ 8 ສະຫາຍ.