ໃນວັນທີ 14 ກໍລະກົດ 2023 ທີ່ສະໂມສອນເມືອງ ສຸຂຸມາ ອົງກາກວດກາລັດເມືອງ ໄດ້ເປີດກອງປະຊຸມເຜີຍແຜ່, ເຊື່ອມຊຶມນິຕິກໍາຕ່າງໆກ່ຽວກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ພາຍໃຕ້ການເປັນປະທານຮ່ວມຂອງ ທ່ານ ປອ ຄໍາໄຕ ແກ້ວປະເສີດ ຮອງເລຂາພັກເມືອງ, ປະທານຄະນະກວດກາພັກ, ປະທານອົງການກວດກາລັດເມືອງ, ຫົວໜ້າສະກັດກັ້ນ ແລະ ຕ້ານການສໍ້ລາດບັງຫຼວງເມືອງ ສຸຂຸມາ ທັງເປັນຫົວໜ້າໜ່ວຍສະມາຊິກສະພາປະຊາຊົນແຂວງ ຈໍາປາສັກ ປະຈໍາເຂດເລືອກຕັ້ງເມືອງ ສຸຂຸມາ ແລະ ທ່ານ ບຸນຍູ້ ປາລະມີ ຄະນະປະຈໍາພັກເມືອງ ຮອງເຈົ້າເມືອງໆ ສຸຂຸມາ ຜູ້ຊີ້ນໍາຂົງເຂດວັດທະນະທໍາສັງຄົມ, ໂດຍມີທ່ານ ສີປະເສີດ ພັນທະວົງ ຮັກສາຫົວໜ້າຂະແໜງສະກັດກັ້ນ ແລະ ຕ້ານການສໍ້ລາດບັງຫຼວງ ຈາກອົງການກວດກາລັດແຂວງຈຳປາສັກ, ມີຮອງເລຂາພັກເມືອງ, ຄະນະປະຈໍາພັກເມືອງ, ກໍາມະການພັກເມືອງ, ກອງກໍ່ສ້າງຮາກຖານແຂວງປະຈໍາເມືອງ, ເລຂາໜ່ວຍພັກ, ປະທານກວດກາໜ່ວຍພັກ, ຄະນະພັກຮາກຖານທັງ 6 ກຸ່ມບ້ານ, ເລຂາຄະນະພັກຮາກຖານບ້ານ ໃຫຍ່ ແລະ ເລຂາໜ່ວຍພັກບ້ານ ທັງໝົດ 94 ທ່ານ, ຍິງ 10 ທ່ານ.

ໃນກອງປະຊຸມ ທ່ານ ປອ ຄໍາໄຕ ແກ້ວປະເສີດ ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານສະກັດກັ້ນ ແລະ ຕ້ານການສໍ້ລາດບັງຫຼວງໃນໄລຍະ 6 ເດືອນຕົ້ນປີ 2023 ແລະ ທິດທາງແຜນການ 6 ເດືອນທ້າຍປີ 2023 ເຊີ່ງໄດ້ຍົກໃຫ້ເຫັນບາງຜົນງານທີ່ພົ້ນເດັ່ນເປັນຕົ້ນແມ່ນອົງການກວດກາລັດເມືອງ ສຸຂຸມາ ໄດ້ເອົາໃຈໃສ່ໃນການຈັດຕັ້ງປະຕິບັດວຽກງານສະກັດກັ້ນ ແລະ ຕ້ານການສໍ້ລາດບັງຫຼວງໃນການລົງເຜີຍແຜ່ເຊື່ອມຊຶມບັນດາກົດໝາຍຕ່າງໆໂດຍສະເພາະແມ່ນກົດໝາຍຕ້ານການສໍ້ລາດບັງຫຼວງ.