ກອງປະຊຸມໃຫຍ່ ຂອງໜ່ວຍພັກຄະນະກວດກາພັກ-ລັດ ເມືອງວຽງພູຄາ, ແຂວງຫຼວງນໍ້າທາ ຄັ້ງທີ I ໄດ້ໄຂຂຶ້ນ ໃນຕອນເຊົ້າ ຂອງວັນທີ 4 ພຶດສະພາ 2023 ຢູ່ທີ່ ຫ້ອງປະຊຸມຂອງຫ້ອງວ່າການເມືອງ ພາຍໃຕ້ການເປັນປະທານ ຂອງ ສະຫາຍ ຕຽງຄໍາ ຊຽນປັນຍາ ເລຂາໜ່ວຍພັກ, ຮອງປະທານຄະນະກວດກາພັກ-ອົງການກວດກາລັດເມືອງ ໂດຍໃຫ້ກຽດເຂົ້າຮ່ວມ ຂອງສະຫາຍ ຕຽງສະໝອນ ພອນປະເສີດ ກໍາມະການພັກແຂວງ ເລຂາຄະນະບໍລິຫານງານພັກເມືອງວຽງພູຄາ, ມີບັນດາສະຫາຍຄະນະປັບປຸງພັກຂັ້ນເມືອງ, ແຂກຖືກເຊີນ ແລະ ຜູ້ແທນສົມບູນ, ສໍາຮອງ ເຂົ້າຮ່ວມຢ່າງພ້ອມພຽງ. ໃນພິທີໄດ້ຮັບຟັງບົດລາຍງານການເມືອງ 2 ພາກ ຂອງໜ່ວຍພັກໃນໄລຍະ 5 ປີຜ່ານມາ ແລະ ທິດທາງແຜນການແຕ່ນີ້ ຮອດ 5 ປີຕໍ່ໜ້າ ແລະ ບົດສໍາຫຼວດການນໍາພາລວມຂອງຄະນະໜ່ວຍພັກ ເຊິ່ງສະແດງໃຫ້ເຫັນຜົນສໍາເລັດໃນຫຼາຍດ້ານ ຕໍ່ການນໍາພາ-ຊີ້ນໍາວຽກງານການເມືອງແນວຄິດ, ວຽກງານຕິດຕາມກວດກາພັກ, ກວດກາລັດ, ສະກັດກັ້ນ, ຕ້ານການສໍ້ລາດບັງຫຼວງ ແລະ ວຽກຄຳຮ້ອງຄຳສະເໜີ ພາຍໃນເມືອງ ໄດ້ຮັບການປັບປຸງດ້ານກົງຈັກການຈັດຕັ້ງ ນັບແຕ່ຂັ້ນເມືອງລົງຮອດຮາກຖານພັກ ເຮັດໃຫ້ສະມາຊິກພັກ, ພະນັກງານ-ລັດຖະກອນ ແລະ ປະຊາຊົນມີຄວາມເຊື່ອໝັ້ນ ໄວ້ວາງໃຈຕໍ່ການນໍາພາຂອງຄະນະກວດກາພັກເມືອງ ແລະ ເຂົ້າຮ່ວມວຽກງານກວດກາຢ່າງກ້ວາງຂວາງ. ຈາກນັ້ນບັນດາສະຫາຍຜູ້ແທນກອງປະຊຸມ, ແຂກທີ່ຖືກເຊີນຍັງໄດ້ຄົ້ນຄວ້າພິຈາລະນາ ແລະ ປະກອບຄຳຄິດ, ຄໍາເຫັນ ຢ່າງກົງໄປກົງມາດ້ວຍຄວາມຮັບຜິດຊອບສູງ, ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງໃນການປະຕິບັດວຽກງານກວດກາໃນໄລຍະຜ່ານມາຢູ່ພາຍໃນຂອບເຂດຄວາມຮັບຜິດຊອບຂອງຕົນ ເພື່ອພ້ອມກັນສືບຕໍ່ຄົ້ນຄວ້າ, ກໍາແໜ້ນ ແລະ ສູ້ຊົນຈັດຕັ້ງປະຕິບັດໃນຕໍ່ໜ້າໃຫ້ປະກົດຜົນເປັນຈິງ.