ໃນຕອນເຊົ້າວັນທີ 30 ກໍລະກົດ 2026 ນີ້, ສະຫາຍ ວັນໄຊ ພອງສະຫວັນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງສູນກາງ, ຜູ້ຊີ້ນຳຮອບດ້ານຢູ່ແຂວງຜົ້ງສາລີ ພ້ອມຄະນະ ແລະ ຄະນະນໍາຂອງແຂວງ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງບຸນໃຕ້, ແຂວງຜົ້ງສາລີ.ໂອກາດນີ້ໄດ້ຮັບຟັງການລາຍງານ ສະພາບໂດຍລວມຂອງເມືອງ ແລະ ການຈັດຕັ້ງປະຕິບັດບັດມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງ ກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2026 ຂອງເມືອງບຸນໃຕ້ ຈາກ ສະຫາຍ ທອງສິງ ອິນທະແສງ ເຊິ່ງສະຫາຍໄດ້ລາຍງານໃຫ້ຮູ້ວ່າ: ເສດຖະກິດຂອງເມືອງເຕີບໂຕ 9.87%, ສາມາດສ້າງມູນຄ່າຜະລິດຕະພັນພາຍໃນ ໄດ້ 587.56 ຕື້ກີບ, ບັນລຸ 54.96% ຂອງແຜນການປີ. ໃນນີ້: ຂະແໜງກະສິກຳ-ປ່າໄມ້ກວມ 26.33%; ຂະແໜງອຸດສາຫະກຳ-ຫັດຖະກຳກວມ 66.73%; ຂະແໜງບໍລິການກວມ 6.94%; ລາຍ ຮັບສະເລ່ຍຕໍ່ຫົວຄົນບັນລຸ 19,23 ລ້ານກີບປະມານ 862 ໂດລາສະຫະລັດ; ໂຄງການລົງທຶນຂອງ ລັດ 6 ໂຄງການມູນຄ່າ 12.6 ຕື້ກີບ, ຊຳລະແລ້ວ 2.9 ຕື້ກີບ; ການຍາດແຍ່ງທຶນກູ້ຍືມ 9 ໂຄງການ ມູນຄ່າ 8.22 ຕື້ກີບ, ທຶນຊ່ວຍເຫຼືອລ້າ 6 ໂຄງການມູນຄ່າ 5.80 ຕື້ກີບ, ການລົງທຶນເອກະຊົນ 22 ໂຄງການມູນຄ່າ 119.70 ຕື້ກີບ ບັນລຸ 52.69% ຂອງແຜນ; ລະບົບທະນາຄານລະດົມເງິນຝາກໄດ້ 501.97 ຕື້ກີບກວມ 78.23% ແລະ ສະໜອງສິນເຊື່ອໄດ້ 6.92 ຕື້ກີບ ກວມ 39.88%; ປະຕິບັດ ລາຍຮັບທ້ອງຖິ່ນໄດ້ 1.33 ຕື້ກີບ ເທົ່າກັບ 27.08% ຂອງແຜນປີ, ຄຸ້ມຄອງລາຍຈ່າຍໄດ້ 1.69 ຕື້ກີບ ເທົ່າກັບ 40.23% ຂອງແຜນປີ.ພາຍຫຼັງໄດ້ຮັບຟັງການລາຍງານ ສະຫາຍ ວັນໄຊ ພອງສະຫວັນ ກໍໄດ້ເຈາະຈີ້ມບາງບັນຫາທີ່ເຫັນວ່າຍັງບໍ່ສາມາດຕີລາຄາອອກຢ່າງຈະແຈ້ງ, ໂອກາດດຽວກັນນີ້ ກໍໄດ້ສະແດງຄວາມຂອບໃຈຕໍ່ຄະນະພັກ, ຄະນະນຳຂອງເມືອງທີ່ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຊົມເຊີຍຕໍ່ຜົນສຳເລັດໃນການຈັດຕັ້ງປະຕິບັດວຽກງານແຕ່ລະດ້ານພ້ອມເນັ້ນໃຫ້ ຄະນະພັກ, ຄະນະນຳ,ອະດີດການນຳ,ພະນັກງານນັກຮົບ ແລະ ພະນັກງານຫຼັກແຫ່ງຂອງເມືອງ ພ້ອມກັນເອົາໃຈໃສ່ໃນການນຳພາ-ຊີ້ນຳໂດຍສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງສູນກາງພັກ,ການຈັດຕັ້ງປະຕິບັດວາລະແຫ່ງຊາດ ຕິດພັນກັບມະຕິກອງປະຊຸມໃຫ່ຍຄັ້ງທີ XII ອົງຄະນະພັກແຂວງຜົ້ງສາລີ, ຄັ້ງທີ VII ຂອງເມືອງ, ແຜນພັດທະນາເສດຖະກິດ-ສັງຄົມຂອງເມືອງຕິດພັນກັບຄາດໝາຍສູ້ຊົນຂອງແຂວງ, ຂອງເມືອງໃນ 5 ປີຕໍ່ໜ້າໃຫ້ໄປຕາມທິດທາງທີ່ກຳນົດໄວ້ ໃຫ້ສອດຄ່ອງກັບທ່າແຮງຂອງເມືອງ, ເພີ່ມທະວີໃນການສ້າງການຫັນປ່ຽນເພື່ອເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນກວ່າເກົ່າ; ສືບຕໍ່ເອົາໃຈໃສ່ໃນການພັດທະນາເສດຖະກິດ-ສັງຄົມ,ການຜະລິດກະສິກຳການປູກ -ການລ້ຽງ, ສົ່ງເສີມເສດຖະກິດພູມປັນຍາຂອງປະຊາຊົນທີ່ສາມາດຜະລິດເປັນສິນຄ້າ ເພື່ອສະໜອງພາຍໃນເມືອງພາຍໃນແຂວງ ຫຼື ສ້າງໃຫ້ເປັນສິນຄ້າໂອດັອບເພື່ອສົ່ງອອກ, ສ້າງຖານລາຍຮັບທີ່ມີຄວາມຍຶນຍົງເພື່ອສ້າງຊິວິດການເປັນຢູ່ຂອງປະຊາຊົນໃຫ້ດີຂຶ້ນ, ຊຸກຍູ້ສົ່ງເສີມຫົວໜ່ວຍວິສາຫະກິດຂະໜາດນ້ອຍເປັນຕົ້ນແມ່ນແຫຼ່ງຜະລິດ, ຕະຫຼາດສົ່ງອອກ ແລະ ດ້ານເຕັກນິກວິຊາການ; ສ້າງກຸ່ມການຜະລິດທີ່ສາມາດເຂົ້າເຖິງແຫຼ່ງທຶນເຂົ້າເຖິງຕະຫຼາດໄດ້ເພື່ອໃຫ້ມີຄວາມເຂັ້ມແຂງ ແລະ ຍືນຍົງ, ດືງດູດການລົງທຶນຈາກພາຍໃນ ແລະ ຕ່າງປະເທດ, ພັດທະນາແຫຼ່ງທ່ອງທ່ຽວຕິດພັນກັບໂຄສະນາເພື່ອດືງດູດນັກທ່ອງທ່ຽວ; ການຜະລິດສິນຄ້າ, ການແປຮູບການປຸງແຕ່ງການຫຸ້ມຫໍ່ຜະລິດຕະພັນຕ່າງໆກໍ່ເຮັດໃຫ້ເປັນຫຼາຍຮູບຫຼາຍສີເພື່ອເພີ່ມມູນຄ່າສິນຄ້າ, ການບໍລິການຕ່າງໆກໍຕ້ອງຊຸກຍູ້ສົ່ງເສີມໂດຍສະເພາະການບໍລິການໂຮງແຮມ, ເຮືອນພັກ; ເອົາໃຈໃສ່ຊຸກຍູ້ສົ່ງເສີມໃຫ້ລູກຫຼານໄດ້ຮັບການສຶກສາ, ສ້າງສີມືແຮງງານໃຫ້ມີຄວາມຮູ້ຄວາມສາມາດ; ເພີ່ມທະວີການປ້ອງກັນຊາດ-ປ້ອງກັນຄວາມສະຫງົບພາຍໃນເມືອງໃຫ້ເປັນໜ້າທີຂອງໝົດທຸກຄົນ ແກ້ໄຂບັນຫາປະກົດການຫຍໍ້ທໍ້ໂດຍສະເພາະບັນຫາຢາເສບຕິດ; ເອົາໃຈໃສ່ກໍ່ສ້າງພັກປອດໃສ, ເຂັ້ມແຂງ, ໜັກແໜ້ນ, ການຂະຫຍາຍພັກຕ້ອງໃຫ້ມີຄຸນນະພາບ, ການສ້າງພະນັກງານຕ້ອງສ້າງໃນຫຼາຍຮູບຫຼາຍແບບເປັນຕົ້ນແມ່ນການສ້າງເປັນລະບົບຢູ່ໂຮງຮຽນ, ການປະຕິບັດວຽກງານຕົວຈິງ ແລະ ສ້າງຢູ່ຮາກຖານ; ວຽກງານກວດກາ ຄະນະພັກຕ້ອງມີຄວາມຮັບຜິດຊອບໂດຍກົງຕໍ່ວຽກງານກວດກາ, ຄະນະກວດກາຕ້ອງເປັນເສນາທິການໃນການຈັດຕັ້ງປະຕິບັດຕາມແຜນຂອງຄະນະພັກ, ເພາະບັນດາຄາດໝາຍສູ້ຊົນ, ຊອກໃຫ້ເຫັນດ້ານອ່ອນເພື່ອປັບປຸງແກ້ໄຂ, ພ້ອມດຽວກັນນັ້ນກໍເພື່ອປ້ອງກັນບໍ່ໃຫ້ມີການລະເມີດຕໍ່ກົດລະບຽບຂອງພັກ, ກົດໝາຍ ແລະ ລະບຽບການຕ່າງໆຂອງລັດ; ວຽກງານຈັດຕັ້ງມະຫາຊົນກໍ່ໃຫ້ເອົາໃຈໃສ່ຊຸກຍູ້ສົ່ງເສິມໃຫ້ມີການເຄື່ອນໄຫວຢ່າງປົກກະຕິ; ດ້ານຄວາມຮັບຜິດຊອບຂອງຄະນະພັກ ບັນດາທິດທາງແຜນການວຽກງານທີ່ກຳນົດໄວ້ໃນແຜນພັດທະນາແມ່ນຄະນະພັກຕ້ອງເປັນຫົວຈັກສຳຄັນໃນການນຳພາ-ຊີ້ນຳເຄື່ອນໄຫວວຽກງານໃນແຕ່ລະດ້ານ, ພ້ອມນີ້ກໍຕ້ອງຮັກສາຄວາມສາມັກຄີພາຍໃນໃຫ້ເປັນປຶກແຜ່ນໃຫ້ມິຄວາມເປັນເອກະພາບສູງ, ຕົກລົງເປັນໝູ່ຄະນະ.