ໃນວັນທີ 17 ມິຖຸນາ 2026 ຄະນະກວດກາສູນກາງພັກ ໄດ້ຈັດກອງປະຊຸມ ທາບທາມເນື້ອໃນເອກະສານກອງປະຊຸມໃຫຍ່ ແລະ ບຸກຄະລາກອນ ອອກສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກ ຄະນະກວດກາສູນກາງພັກ ແລະ ອົງການກວດກາແຫ່ງລັດ ສະໄໝທີ V ຮອບທີ II ຂຶ້ນ ທີ່ສະໂມສອນ ຄະນະກວດກາສູນກາງພັກ. ໂດຍການເປັນປະທານຂອງ ສະຫາຍ ວັນໄຊ ພອງສະຫວັນ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງສູນກາງ, ມີສະຫາຍ ວິໄລວັນ ບຸດດາຄຳ ກຳມະການສູນກາງພັກ,​ ຮອງຫົວໜ້າຄະນະຈັດຕັ້ງສູນກາງພັກ, ບັນດາສະຫາຍຮອງປະທານຄະນະກວດກາສູນກາງພັກ ແລະ ອົງການກວດກາແຫ່ງລັດ, ບັນດາສະຫາຍຄະນະພັກ, ຄະນະໜ່ວຍພັກ, ສະມາຊິກພັກອາວຸໂສບຳນານ ແລະ ສະມາຊິກພັກສົມບູນ ທີ່ຂຶ້ນກັບຄະນະກວດກາສູນກາງພັກເຂົ້າຮ່ວມ.ໃນກອງປະຊຸມ ສະຫາຍ ສຸກຄຳເພັດ ເຮືອງບຸດສີ ກຳມະການສູນກາງພັກ, ຮອງປະທານຄະນະກວດກາສູນກາງພັກ ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງສູນກາງ ໄດ້ຜ່ານຮ່າງບົດລາຍງານການເມືອງ ຂອງຄະນະບໍລິຫານງານພັກ ຄະນະກວດກາສູນກາງພັກ ສະໄໝທີ IV; ສະຫາຍ ນາງ ປິ່ງຄຳ ລາຊະສີມມາ ກຳມະການສູນກາງພັກ ຮອງປະທານຄະນະກວດກາສູນກາງພັກ ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງສູນກາງ ກໍໄດ້ຜ່ານຮ່າງບົດສະຫຼຸບ ຕີລາຄາການຈັດຕັ້ງປະຕິບັດແຜນພັດທະນາ ວຽກງານກວດກາ 5 ປີ (2021-2025) ແລະ ທິດທາງແຜນການພັດທະນາວຽກງານກວດກາ 5 ປີ (2026-2030); ສະຫາຍ ຄຳໄຫຼ ສີປະເສີດ ກຳມະການສູນກາງພັກ, ຮອງເລຂາຄະນະພັກ, ຮອງປະທານຄະນະກວດກາສູນກາງພັກ ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງສູນກາງ ຜ່ານຮ່າງບົດສຳຫຼວດການນຳພາລວມ ຂອງຄະນະບໍລິຫານງານພັກ ຄະນະກວດກາສູນກາງພັກ ສະໄໝທີ IV.ຈາກນັ້ນປະທານກອງປະຊຸມ ກໍໄດ້ມີຄຳເຫັນຊີ້ນຳຕໍ່ການປະກອບຄຳເຫັນໃສ່ 3 ຮ່າງເອກະສານດັ່ງກ່າວນັ້ນໂດຍສະເພາະໃຫ້ເບິ່ງດ້ານດີ, ດ້ານອ່ອນ ແລະ ທິດທາງແຜນການ 5 ປີຕໍ່ໜ້ານັ້ນ ພ້ອມກັນຕີລາຄາໃສ່ເນື້ອໃນໃຫ້ສອດຄ່ອງແທດເໝາະກັບມະຕິ 12 ຂອງພັກ, ເບິ່ງຄວາມອາດສາມາດໃນການຈັດຕັ້ງປະຕິບັດເນື້ອໃນຈິດໃຈຊີ້ນຳຂອງຂັ້ນເທິງ, ພ້ອມນີ້ ສະຫາຍຍັງໄດ້ເນັ້ນໃຫ້ຜູ້ເຂົ້າຮ່ວມ ເຊີດຊູຄວາມຮັບຜິດຊອບ ເປັນເຈົ້າການ ໃນການປະກອບຄຳເຫັນຕໍ່ເອກະສານ ເພື່ອໃຫ້ມີເນື້ອໃນສົມບູນຄົບຖ້ວນ. ຈາກນັ້ນ, ຜູ້ແທນກອງປະຊຸມກໍໄດ້ຜັດປ່ຽນກັນປະກອບຄຳເຫັນ ຕໍ່ 3 ຮ່າງເອກະສານທີ່ເຫັນວ່າບໍ່ທັນແທດເໝາະສົມບູນຄົບຖ້ວນ.ຫຼັງຈາກນັ້ນ ສະຫາຍ ວິໄລວັນ ບຸດດາຄຳ ກໍໄດ້ຜ່ານມາດຕະຖານ ເງື່ອນໄຂຜູ້ອອກຮັບສະໝັກເລືອກຕັ້ງ ຄະ ນະບໍລິຫານງານພັກ, ​ຄະນະປະຈຳພັກ, ເລຂາ-ຮອງເລຂາຄະນະພັກ, ປະທານ-ຮອງປະທານ ຄະນະກວດກາພັກ ຮອບທີ II.ໃນໂອກາດນີ້, ສະຫາຍ ວັນໄຊ ພອງສະຫວັນ ກໍໄດ້ມີຄຳເຫັນຕໍ່ການທາບທາມ ຄະນະບໍລິຫານງານພັກ, ຄະນະປະຈຳພັກ, ເລຂາ, ຮອງເລຂາຄະນະພັກ, ປະທານ ແລະ ຮອງປະທານກວດກາພັກເຊິ່ງສະຫາຍໄດ້ເນັ້ນໃຫ້ ຜູ້ແທນຍົກສູງຄວາມເປັນເຈົ້າການໃນການຄົ້ນຄວ້າເລືອກເຟັ້ນເອົາບຸກຄະລາກອນເຂົ້າໃນຄະນະບໍລິຫານງານພັກໃນຄັ້ງນີ້ໂດຍໃຫ້ອີງໃສ່ມາດຕະຖານເງື່ອນໄຂເປັນຕົ້ນແມ່ນມາດຕະຖານທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ ແລະ ແບບແຜນການດຳລົງຊີວິດ, ຄວາມຮູ້ຄວາມສາມາດ, ແບບແຜນການນຳພາ, ວິທີເຮັດວຽກ ແລະ ດ້ານສຸຂະພາບ;​ ຫຼີກເວັ້ນທັດສະນະອັກຄະຕິສ່ວນຕົວ, ໃຫ້ຍົກສູງຜົນປະໂຫຍດສ່ວນລວມເປັນກົກ. ຈາກນັ້ນ, ຜູ້ແທນກອງປະຊຸມກໍໄດ້ໃຊ້ສິດໃນການປ່ອນບັດທາບທາມຮອບທີ II ເພື່ອເລືອກເອົາບຸກຄະລາກອນອອກຮັບສະໝັກເລືອກຕັ້ງໃນກອງປະຊຸມໃຫຍ່ ສະມາຊິກພັກ ຂອງອົງຄະນະພັກ ຄະນນະກວດກາສູນກາງພັກ ຄັ້ງທີ V.