ໂອກາດນີ້, ທ່ານ ວັນໄຊ ພອງສະຫວັນ ໄດ້ສະແດງຄວາມຍິນດີຕ້ອນຮັບ ຄະນະຊ່ຽວຊານ ທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວໃນຄັ້ງນີ້, ພ້ອມນີ້ ກໍໄດ້ສະແດງຄວາມຂອບໃຈຕໍ່ຄະນະຊ່ຽວຊານ ທີ່ໃຫ້ກຽດມາປາຖະກະຖາເອກະສານບົດຮຽນ ສປ ຈີນ ກ່ຽວກັບ ສະພາບການຜັນຂະຫຍາຍ ແລະ ຈັດຕັ້ງປະຕິບັດຈິດໃຈຂໍ້ກຳນົດ 08 ຂໍ້ຂອງສູນກາງພັກກອມມູນິດຈີນ; ທັດສະນະ ແລະ ຜົນສໍາເລັດໃນການຊຸກຍູ້ການສ້າງຄວາມປອດໃສຂາວສະອາດຂອງພັກ ແລະ ວຽກງານຕ້ານການສໍ້ລາດບັງຫຼວງຂອງປະເທດຈີນໃຫ້ພະນັກງານກວດກາຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ, ບັນດາກະຊວງ-ອົງການ ແລະ ຖ້ອງຖິ່ນຂອງສປປລາວ, ພ້ອມນີ້ທ່ານຍັງໄດ້ກ່າວຕື່ມອີກວ່າ: ຂ້າພະເຈົ້າຫວັງວ່າທ່ານຈະນໍາເອົາບົດຮຽນອັນມີຄຸນຄ່າຂອງສປຈີນມາເເບ່ງປັນໃຫ້ພະນັກງານກວດກາ ສປປ ລາວຂອງພວກຂ້າພະເຈົ້າໄດ້ຮັບຮູ້ ແລະ ເຂົ້າໃຈ ແລະ ສາມາດນຳມາໝູນໃຊ້ເຂົ້າໃນການເຄື່ອນໄຫວວຽກງານກວດກາຂອງ ສປປ ລາວ ໃນຕໍ່ໜ້າ.

ຈາກນັ້ນ ທ່ານ ນາງ ມາຈັນ ກໍ່ໄດ້ສະແດງຄວາມຂອບໃຈຕໍ່ສະຫາຍ ວັນໄຊ ພອງສະຫວັນ ພ້ອມດ້ວຍຄະນະ ທີ່ໃຫ້ກຽດຕ້ອນຮັບຄະນະຊ່ຽວຊານຈາກຄະນະກຳມະການກວດກາລະບຽບວິໃນສູນກາງພັກກອມມູນິດຈີນ ແລະ ຄະນະກຳມະການກວດກາລັດແຫ່ງຊາດຈີນ ໃນຄັ້ງນີ້ ຢ່ງອົບອຸ່ນ ແລະ ກ່າວຕື່ມອີກວ່າ ການເດີນທາງມາສປປ ລາວຂອງພວກຂ້າພະເຈົ້າໃນຄັ້ງນີ້ແມ່ນໄດ້ຮັບການມອບໝາຍຈາກສູນກາງພັກ ແລະ ລັດຖະບານສປຈີນ ໃຫ້ພວກຂ້າພະເຈົ້ານໍາເອົາບົດຮຽນກ່ຽວກັບກ່ຽວກັບ ສະພາບການຜັນຂະຫຍາຍ ແລະ ຈັດຕັ້ງປະຕິບັດຈິດໃຈຂໍ້ກຳນົດ 08 ຂໍ້ຂອງສູນກາງພັກກອມມູນິດຈີນ; ທັດສະນະ ແລະ ຜົນສໍາເລັດໃນການຊຸກຍູ້ການສ້າງຄວາມປອດໃສຂາວສະອາດຂອງພັກ ແລະ ວຽກງານຕ້ານການສໍ້ລາດບັງຫຼວງຂອງປະເທດຈີນ ມາປາຖະກະຖາໃຫ້ພະນັກງານກວດກາຂອງ ສປປ ລາວ, ພວກເຮົາຈະສຸມສະຕິປັນຍາ ແລະ ບົດຮຽນທີ່ພວກເຮົາມີຖອດຖອນບົດຮຽນໃຫ້ພະນັກງານກວດກາຂອງ ສປປ ລາວ ໄດ້ຮັບຮູ້ເຂົ້າໃຈ ແລະ ນໍາໄປໝູນໃຊ້ເຂົ້າໃນການເຄື່ອນໄຫວວຽກງານກວດກາຕົວຈິງ.