ໃນວັນທີ 30 ສິງຫາ 2024 ນີ້, ທີ່ຫ້ອງປະຊຸມ ຄະນະກວດກາສູນກາງພັກ, ຫ້ອງການ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດພິທີມອບຮັບໜ້າທີ່ຫົວໜ້າ ຫ້ອງການ ຜູ້ເກົ່າ ແລະ ຜູ້ໃໝ່ຂຶ້ນ ລະຫວ່າງສະຫາຍ ອາລິສັກ ພົມປິດາ ກໍາມະການພັກຄະນະກວດກາສູນກາງພັກ, ເລຂາໜ່ວຍພັກ, ຫົວໜ້າ ຫ້ອງການຄະນະກວດກາສູນກາງພັກ (ຜູ້ເກົ່າ) ແລະ ສະຫາຍ ກົງໃຈ ວິລະສັກ ຫົວໜ້າຫ້ອງການ (ຜູ້ໃໝ່), ໂດຍໃຫ້ກຽດເຂົ້າຮ່ວມຂອງສະຫາຍ ວິໄລວັນ ບຸດດາຄໍາ ກໍາມະການສໍາຮອງສູນກາງພັກ, ກໍາມະການປະຈໍາພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີຜູ້ຕາງໜ້າຈາກກົມຈັດຕັ້ງ-ພະນັກງານ, ຄະນະກົມ, ຄະນະພະແນກ, ສະມາຊິກພັກ, ພະນັກງານ-ລັດຖະກອນພາຍໃນຫ້ອງການ ເຂົ້າຮ່ວມ.

​ໃນພິທີ ສະຫາຍ ອາລິສັກ ພົມປີດາ ຫົວໜ້າຫ້ອງການ (ຜູ້ເກົ່າ) ໄດ້ລາຍງານການເຄື່ອນໄຫວນໍາພາ-ຊີ້ນໍາການຈັດຕັ້ງປະຕິບັດວຽກງານໃນໄລຍະຜ່ານມາ ທີ່ໄດ້ມີຜົນສໍາເລັດຫຼາຍດ້ານ ເປັນຕົ້ນວຽກງານສຶກສາອົບຮົມການເມືອງ-ແນວຄິດ, ການນໍາພາເຄື່ອນໄຫວວຽກງານວິຊາສະເພາະຕາມພາລະບົດບາດ, ການນໍາພາປັບປຸງກົງຈັກການຈັດຕັ້ງ ແລະ ພະນັກງານ, ວຽກທີ່ຍັງຄົງຄ້າງທີ່ຈະຕ້ອງໄດ້ສືບຕໍ່ແກ້ໄຂ ແລະ ທິດທາງແຜນການໃນຕໍ່ໜ້າ. ຈາກນັ້ນ, ສະຫາຍ ນາງ ດວງປີ ຈັນທະລັງສີ ຫົວໜ້າພະແນກ ຕາງໜ້າກົມຈັດຕັ້ງ-ພະນັກງານ ໄດ້ຜ່ານຂໍ້ຕົກລົງວ່າດ້ວຍການປະຕິບັດນະໂຍບາຍພາຍໃນໃຫ້ແກ່ພະນັກງານອອກພັກການຮັບອຸດໜູນບໍານານ ເຊິ່ງໃຫ້ກຽດມອບໂດຍ ສະຫາຍ ວິໄລວັນ ບຸດດາຄໍາ. ພ້ອມດຽວກັນນີ້, ໄດ້ມີພິທີເຊັນບົດບັນທຶກມອບ-ຮັບໜ້າທີ່ຫົວໜ້າຫ້ອງການ (ຜູ້ເກົ່າ) ແລະ (ຜູ້ໃໝ່) ໂດຍພາຍໃຕ້ການເປັນສັກຂີພິຍານຂອງຄະນະພັກ, ຄະນະນໍາ ຕະຫຼອດຮອດສະມາຊິກພັກ, ພະນັກງານ ພາຍໃນຫ້ອງການ ພ້ອມດ້ວຍແຂກຖືກເຊີນ ເຂົ້າຮ່ວມ.