ພາຍຫຼັງໜ່ວຍງານຂອງກົມຕິດຕາມ, ກວດກາ ການປະຕິບັດຜົນຂອງການກວດກາ ໄດ້ຕິດຕາມ ແລະ ຊຸກຍູ້ການແກ້ໄຂຜົນຂອງການກວດກາ ຕາມຂໍ້ຕົກລົງຂອງປະທານອົງການກວດກາແຫ່ງລັດ ສະບັບເລກທີ 182/ອກຫລ, ລົງວັນທີ 10 ພຶດສະພາ 2024 ໂດຍສົມທົບກັບກົມກວດກາ ກະຊວງໂຍທາທິການ ແລະ ຂົນສົ່ງ, ກົມ, ກອງ, ລັດວິສາຫະກິດທີ່ກ່ຽວຂ້ອງ ເພື່ອຕິດຕາມ, ຊຸກຍູ້ ການແກ້ໄຂຜົນຂອງການກວດກາ ຕາມມະຕິຂອງສະພາແຫ່ງຊາດ ແລະ ຜົນການກວດກາທີ່ຄະນະພັກ, ຄະນະນໍາຂອງກະຊວງ ໄດ້ພິຈາລະນາຕົກລົງແກ້ໄຂ ໂດຍກົມກວດກາ ກະຊວງໂຍທາທິການ ແລະ ຂົນສົ່ງ ໄດ້ເຊີນ 10 ພາກສ່ວນ ຄື: ກົມແຜນການ ແລະ ການເງິນ, ກົມຂົວທາງ, ກົມທາງນໍ້າ, ກົມນໍ້າປະປາ, ກົມການບິນພົນລະເຮືອນ, ກົມຂົນສົ່ງ, ກົມທາງລົດໄຟ, ກອງສະໜາມບິນລາວ, ກອງຈະລາຈອນທາງອາກາດ, ລັດວິສາຫະກິດການບິນລາວ ເພື່ອເຂົ້າຮ່ວມກອງປະຊຸມປຶກສາຫາລື, ລາຍງານຄວາມຄືບໜ້າການແກ້ໄຂຜົນການກວດກາໄລຍະຜ່ານມາ ມີດ້ານດີຜົນສໍາເລັດ, ຂໍ້ຄົງຄ້າງ ແລະ ທິດທາງແກ້ໄຂ. ພ້ອມກັນນັ້ນ, ຍັງໄດ້ເອກະພາບໃນການແກ້ໄຂຜົນການກວດກາທີ່ເກີດຂຶ້ນກັບຄວາມຮັບຜິດຊອບຂອງແຕ່ລະພາກສ່ວນທີ່ກ່ຽວຂ້ອງ. ຜ່ານການຕິດຕາມ, ກວດກາ ແລະ ຊຸກຍູ້ ການແກ້ໄຂຜົນການກວດກາ ເຫັນວ່າຍັງມີບາງເປົ້າໝາຍບໍ່ທັນສໍາເລັດ.

ສະນັ້ນ, ໃນວັນທີ 26 ກໍລະກົດ 2024, ກົມຕິດຕາມ, ກວດກາ ການປະຕິບັດຜົນຂອງການກວດກາ ຄະນະກວດກາສູນກາງພັກ ແລະ ອົງການກວດກາແຫ່ງລັດ ຮ່ວມກັບກົມກວດກາ ກະຊວງໂຍທາທິການ ແລະ ຂົນສົ່ງ ໄດ້ຈັດກອງປະຊຸມປຶກສາຫາລືກ່ຽວກັບການແກ້ໄຂຜົນຂອງການກວດກາຕາມຜົນການກວດສອບຂຶ້ນ ທີ່ຫ້ອງປະຊຸມຊັ້ນ II (ຕຶກເກົ່າ) ຄະນະກວດກາສູນກາງພັກ ແລະ ອົງການກວດກາແຫ່ງລັດ. ໂດຍໃຫ້ກຽດເປັນປະທານຂອງທ່ານ ໄຊຄໍາ ອຸ່ນມີໄຊ ກໍາມະການພັກ ຄະນະກວດກາສູນກາງພັກ, ສະມາຊິກສະພາແຫ່ງຊາດ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ທ່ານ ໄຊສົງຄາມ ມະໂນທັມ ຄະນະປະຈໍາພັກກະຊວງ, ປະທານຄະນະກວດກາພັກກະຊວງ, ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ມີຄະນະກົມ, ຄະນະພະແນກ ກົມຕິດຕາມ, ກວດກາ ການປະຕິບັດຜົນຂອງການກວດກາ, ຮອງຫົວໜ້າກົມກວດກາ ກະຊວງໂຍທາທິການ ແລະ ຂົນສົ່ງ, ພະນັກງານວິຊາການຂອງສອງພາກສ່ວນເຂົ້າຮ່ວມ.

ໃນກອງປະຊຸມດັ່ງກ່າວ, ທ່ານ ໄຊຄໍາ ອຸ່ນມີໄຊ ປະທານກອງປະຊຸມ ຍັງໄດ້ມີຄໍາເຫັນເຈາະຈີ້ມ ບາງບັນຫາທີ່ຍັງບໍ່ທັນຈະແຈ້ງ ເປັນຕົ້ນ ການແກ້ໄຂຜົນການກວດກາ ຕາມຜົນການກວດສອບ ຕາມມະຕິຂອງສະພາແຫ່ງຊາດ ສະບັບເລກທີ 14/ສພຊ, ລົງວັນທີ 04 ພະຈິກ 2020 ກ່ຽວກັບການເກັບກູ້ໜີ້ຄ້າງມອບເຂົ້າງົບປະມານຕາມຜົນການກວດສອບ ປະຈໍາປີ 2018 ຈໍານວນ 146,53 ຕື້ກີບ ລວມ 05 ເປົ້າໝາຍ ຄື: ກົມການບິນພົນລະເຮືອນ, ກົມຂົນສົ່ງ, ກອງສະໜາມບິນລາວ, ກອງຈະລາຈອນທາງອາກາດລາວ, ກອງເລຂາກອງທຶນທາງ; ຜົນການກວດກາໂຄງການລົງທຶນຂອງລັດຕາມແຈ້ງການ 130/ຫສນຍ; ການແກ້ໄຂຜົນຂອງການກວດກາ ທີ່ຍັງຄ້າງແກ້ໄຂບໍ່ທັນສໍາເລັດ 03 ເປົ້າໝາຍ ຄື: ການແກ້ໄຂຜົນການກວດກາກົມການບິນພົນລະເຮືອນ ແລະ ບໍລິສັດຊີໄອທີລາວ, ການແກ້ໄຂຜົນການກວດກາຫົວໜ້າກອງຈະລາຈອນອາກາດ, ບຸກຄົນ ແລະ ນິຕິບຸກຄົນ ແລະ ການແກ້ໄຂຜົນການກວດກາການປັບປຸງລັດວິສາຫະກິດລາວ. ຈາກນັ້ນ, ທ່ານ ທອງປານ ອິນທະຈັກ ຮອງຫົວໜ້າກົມກວດກາ ກະຊວງໂຍທາທິການ ແລະ ຂົນສົ່ງ ໄດ້ລາຍງານສະພາບການເຄື່ອນໄຫວແກ້ໄຂຜົນຂອງການກວດກາຂອງກະຊວງ ຍທຂ ໃນໄລຍະຜ່ານມາ. ພ້ອມດຽວກັນນີ້້, ທັງສອງຝ່າຍຍັງໄດ້ສົນທະນາ ຖອດຖອນບົດຮຽນເຊິ່ງກັນ ແລະ ກັນ ໃນບາງບັນຫາທີ່ຍັງບໍ່ທັນຈະແຈ້ງ ເພື່ອສ້າງຄວາມເປັນເອກະພາບ, ຄວາມຖືກຕ້ອງຊັດເຈນ ໃນການຈັດຕັ້ງປະຕິບັດ ການແກ້ໄຂຜົນການກວດກາຢູ່ກະຊວງໂຍທາທິການ ແລະ ຂົນສົ່ງ ໃຫ້ໄດ້ຮັບປະສິດທິພາບ ແລະ ປະສິດທິຜົນສູງ.