ໃນຕອນບ່າຍຂອງວັນທີ 18 ພະຈິກ 2024, ທີ່ສະໂມສອນ ຄກສພ-ອກຫລ ສະຫະພັນກຳມະບານ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດກອງປະຊຸມ ທາບທາມບຸກຄະລາກອນ ຮອບທີ 1 ຂຶ້ນ, ພາຍໃຕ້ການເປັນປະທານ ຂອງ ທ່ານ ແສງທອງ ຊາວພູວົງ ຄະນະບໍລິຫານງານສູນກາງກໍາມະບານລາວ, ປະທານສະຫະພັນກໍາມະບານ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໂດຍໃຫ້ກຽດເຂົ້າຮ່ວມຂອງ ທ່ານ ສຸກຄຳເພັດ ເຮືອງບຸດສີ ກຳມະການປະຈຳພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ຜູ້ຊີ້ນໍາອົງການຈັດຕັ້ງມະຫາຊົນ, ມີຫົວໜ້າຫ້ອງການ-ຮອງຫົວໜ້າຫ້ອງການ, ບັນດາຫົວໜ້າກົມ-ຮອງກົມ ພ້ອມດ້ວຍສະມາຊິກກໍາມະບານ ທົ່ວຄະນະກວດກາສູນກາງພັກ ແລະ ອົງການກວດກາແຫ່ງລັດ ເຂົ້າຮ່ວມ.

ໃນກອງປະຊຸມ ທ່ານ ແສງທອງ ຊາວພູວົງ ໄດ້ຜ່ານຮ່າງບົດສຳຫຼວດການນຳພາລວມ ຂອງສະຫະພັນກຳມະບານ ຄກສພ-ອກຫລ, ເຊິ່ງໄດ້ໃຫ້ຮູ້ວ່າ: ຄະນະບໍລິຫານງານສະຫະພັນກຳມະບານ ຄະນະກວດກາສູນກາງພັກ ເເລະ ອົງການກວດກາແຫ່ງລັດ ໄດ້ເອົາໃຈໃສ່ນໍາພາ-ຊີ້ນໍາ, ປຸກລະດົມ ແລະ ຊຸກຍູ້ສະມາຊິກກໍາມະບານ ເປັນເຈົ້າການເຂົ້າຮ່ວມຄົ້ນຄວ້າເຊືີ່ອມຊຶມແນວທາງນະໂຍບາຍ, ມະຕິ, ຄໍາສັ່ງ, ກົດລະບຽບຂອງພັກ, ກົດໝາຍຂອງລັດ ແລະ ບັນດາຂໍ້ກໍານົດ, ກົດລະບຽບຕ່າງໆ ຂອງກໍາມະບານວາງອອກໃນແຕ່ລະໄລຍະ; ໄປຄຽງຄູ່ກັບການນໍາພາສຶກສາອົບຮົມການເມືອງ-ແນວຄິດ, ການປະຕິບັດຂໍ້ແຂ່ງຂັນ “ຮັກຊາດ ແລະ ພັດທະນາ” ແລະ ຂໍ້ແຂ່ງຂັນ “3 ໜ້າທີີ່ 12 ຂໍໍ້ປະຕິບັດ” ກໍຄືຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານ. ບົນພື້ນຖານດັ່ງກ່າວໄດ້ເຮັດໃຫ້ສະມາຊິກກໍາມະບານ ເປັນແບບຢ່າງນໍາໜ້າໃນການຝຶກຝົນຫຼໍ່ຫຼອມຕົນເອງດ້ານທັດສະນະຫຼັກໝັັ້ນການເມືອງ, ມີຄຸນສົມບັດສິນທໍາປະຕິວັດ, ມີສະຕິຕໍ່ການຈັດຕັັ້ງ, ຕໍ່ກົດໝາຍ ແລະ ລະບຽບການຕ່າງໆຂອງລັດ, ສັດຊືີ່ບໍລິສຸດ, ບໍ່ສວຍໃຊ້ໜ້າທີ່ຕໍາແໜ່ງ, ຕ້ານທຸກການກະທໍາທີ່ບໍ່ຖືກຕ້ອງ, ມີສະຕິລະວັງຕົວຕໍ່ກົນອຸບາຍມ້າງເພທໍາລາຍຂອງສັດຕູ ແລະ ພວກຄົນບໍ່ດີ , ມີຄວາມອົດທົນ, ບໍ່ຄອນແຄນຕໍ່ສະພາບຄວາມຫຍຸ້ງຍາກທາງດ້ານເສດຖະກິດ ແລະ ມີຄວາມອຸ່ນອ່ຽນທຸ່ນທ່ຽງໃນການເຮັດໜ້າທີ່ວຽກງານທີ່ໄດ້ຮັບມອບໝາຍໄດ້ເປັນຢ່າງດີ. ພ້ອມດຽວກັນນັ້ນ, ກໍຍັງໄດ້ມີການປະກອບຄຳຄິດເຫັນຢ່າງກົງໄປກົງມາ ເພື່ອເຮັດໃຫ້ເນື້ອໃນຮ່າງບົດສຳຫຼວດດັ່ງກ່າວຄົບຖ້ວນ, ສົມບູນຂຶ້ນຕື່ມ.

ພາຍຫຼັງ ທ່ານ ໄພວັນ ພົມມະແສງ ຮອງຫົວໜ້າກົມຈັດຕັ້ງ-ພະນັກງານ ໄດ້ຜ່ານມາດຖານເງື່ອນໄຂຂອງຜູ້ສະໝັກຮັບເລືອກຕັ້ງສະຫະພັນກຳມະບານຊຸດໃໝ່ແລ້ວ,

ທ່ານ ສຸກຄຳເພັດ ເຮືອງບຸດສີ, ຍັງໄດ້ມີຄໍາເຫັນຊີ້ນໍາ ໂດຍໃຫ້ກວດກາຮ່າງບົດສຳຫຼວດການນຳພາຄືນໃຫ້ລະອຽດຄົບຖ້ວນ, ວິທີເຮັດວຽກ, ຊອກໄດ້ບັນດາຜົນງານຂອງແຕ່ລະໜ່ວຍ, ສ່ອງແສງໃຫ້ເຫັນເຖິງຄວາມເປັນຈິງທີ່ໄດ້ຈັດຕັ້ງປະຕິບັດ, ພ້ອມທັງເນັ້ນໃຫ້ຜູ້ມີສິດເລືອກຕັ້ງ ຕ້ອງເລືອກເອົາຜູ້ທີ່ມີຄວາມຮູ້, ຄວາມສາມາດທີ່ພົ້ນເດັ່ນ, ມີຄວາມຮັບຜິດຊອບສູງ, ຊ່ວຍເຫຼືອປົກປ້ອງສິດຜົນປະໂຫຍດຂອງສະມາຊິກກຳມະບານ, ສາມາດຊີ້ນໍາ-ນໍາພາໃນການປະຕິບັດວຽກງານ ໃຫ້ໄດ້ຮັບໝາກຜົນສູງ.